Në janar të vitit të kaluar, hyri në fuqi ligji i ri “Për shërbimet e pagesave”.
Ligji reflekton parimet kryesore të Direktivës së Dytë të Bashkimit Europian për pagesat (PSD 2) dhe synon të sjellë më shumë konkurrencë në këtë treg, duke krijuar më shumë hapësira për institucionet financiare të pagesave.
Një nga risitë kryesore të ligjit të ri është koncepti i bankingut të hapur, që do t’iu mundësojë përdoruesve të përdorin llogarinë e tyre bankare për të kryer shërbime pagesash të ofruara nga institucione të tjera financiare.
Bankat do të jenë të detyruara të japin akses me aprovimin e titullarit të llogarisë dhe vetëm për qëllime të transaksioneve të pagesave. Mbështetur në konceptin e mësipërm, do të krijohen dy shërbime të reja, ai i informacionit mbi llogaritë dhe shërbimi i inicimit të pagesave.
Ligji i jepte Bankës së Shqipërisë afat njëvjeçar për të përgatitur kuadrin e nevojshëm nënligjor për ta bërë ligjin plotësisht të zbatueshëm. Megjithëse një vit ka kaluar, ky objektiv nuk është arritur dhe rregulloret e nevojshme ende nuk janë miratuar të gjitha.
Në mbledhjen e fundit të Komitetit Kombëtar të Sistemit të Pagesave, zhvilluar në fund të vitit të kaluar, Banka e Shqipërisë ka vendosur si objektiv mesin e vitit 2022 si afat për miratimin e të gjitha akteve të nevojshme nënligjore që do ta bënin ligjin plotësisht të zbatueshëm.
Në nëntor të vitit të kaluar, Këshilli Mbikëqyrës i Bankës së Shqipërisë miratoi një nga rregulloret më të rëndësishme në mbështetje të ligjit të ri, atë “Për licencimin e institucioneve të pagesave, institucioneve të parasë elektronike, si dhe për regjistrimin e ofruesve të shërbimeve të pagesave”.
Rregullorja ka hyrë në fuqi në 1 janar të këtij viti. Paralelisht, Banka e Shqipërisë ka miratuar disa ndryshime në rregulloret e licencimit të bankave dhe institucioneve të tjera financiare që ofrojnë shërbime të pagesave, me qëllim garantimin e përputhshmërisë me ligjin e ri. Të gjitha institucionet ekzistuese dtë pagesave kanë afat deri në 2 korrik 2022 për të përmbushur kërkesat që rrjedhin nga ligji i ri dhe nga ndryshimet rregullatore në mbështetje të tij.
Megjithatë, për të bërë të zbatueshëm ligjin e ri ende duhet miratuar një paketë rregulloresh të tjera. Bëhet fjalë për rregulloren “Për regjistrin publik të ofruesve të shërbimeve të pagesave”, rregulloren “Për autentifikimin e klientit dhe standardet e hapura të përbashkëta dhe të sigurta të komunikimit”, rregulloren “Për administrimin e rrezikut në veprimtarinë e institucioneve të pagesave dhe institucioneve të parasë elektronike” dhe udhëzimin “Për kriteret e përcaktimit të shumës minimale monetare të sigurimit të dëmshpërblimit profesional ose garancive të tjera të krahasueshme”.
Ky i fundit është hedhur për konsultim publik nga Banka e Shqipërisë në muajin janar, ndërsa tre projektrregulloret e tjera janë përgatitur dhe pritet të hidhen për konsultim së shpejti.
Megjithëse ligji i ri ende nuk është i zbatueshëm, miratimi i tij ka sjellë rritje të interesit të investitorëve për tregun e shërbimeve të pagesave. Vitin e kaluar, Banka e Shqipërisë licencoi katër institucione të reja financiare të parasë elektronike, përkatësisht Paysera Albania, eReja, RPay dhe Soft& Solution, që i shtohen institucioneve të licencuara ekzistuese, Union Financiar Tiranë, Posta Shqiptare dhe EasyPay. Së shpejti, pritet të licencohet edhe institucioni i tetë financiar i parasë elektronike, IutePay.
Marrë nga Monitor.al
