KOSOVË-Rasti i 84-vjeçarit nga Mitrovica, i cili u la në spital, së bashku më pacientë të tjerë, për 6 orë pasi kishte humbur jetën, mori vëmendien mediave kosovare dhe vendase.
Gazeta Ekspress ka publikuar foton e 84-vjeçarit, i cili, i mbuluar me batanije dhe peshqirë qëndroi për 6 orë së bashku me pacientët e tjerë. Në lidhje me këtë ngjarje të rëndë, ka folur edhe drejtori i spitalit, Enis Istrefi, i cili, u shpreh se pritja e trupit në spital ka qenë për shkak të procedurave pasi përgjigjja e tamponit ka ardhur pas vdekjes së tij.
“Ky rast ka qenë rasti i parë i vdekjes nga COVID në spitalin tonë. Pritja ka qenë vetëm për çështje të procedurave. Problemi ka qenë se ne e kemi marrë rezultatin për COVID për këtë pacient vetëm pas vdekjes. Në momentin e vdekjes ka qenë pacient i pakonfirmuar me koronavirus. Është dashur që ta presim rezultatin e testit nga IKSHPK dhe pastaj t’i përfundojmë procedurat e tjera. Është dashur pastaj që të njoftohet ministria, kompania për bartjen e kufomave. Kanë qenë disa procedura që është dashur të kryhet”, ka thënë drejtori i Spitalit të Mitrovicës.
