Pasi deklaroi se do të hiqte dorë nga drejtimi i skuadrës së Chelsea-t, miliarderi rus Roman Abramovich njofton se do ta shesë klubin dhe të ardhurat do t’i jepte për bamirësi për viktimat e luftës në Ukrainë.
Në një deklaratë për mediat, Abramovich thotë se ai nuk do t’i kërkojë bluve të Londrës që të shlyejnë huanë prej 1.5 miliardë funte që ai i ka dhënë klubit.
“Në situatën aktuale, kam marrë vendimin për të shitur klubin, pasi besoj se kjo është në interesin më të mirë të klubit, tifozëve, punonjësve, si dhe sponsorëve dhe partnerëve të klubit. Unë kam udhëzuar ekipin tim të krijojë një fondacion bamirësie ku të gjitha të ardhurat neto nga shitja do të dhurohen për viktimat e luftës”, tha Abramovich në një deklaratë.
Një vendim i tillë vjen menjëherë pasi Britania e Madhe kërkoi që Abramovich sanksionohet për shkak të luftës në Ukrainë.
Abramovich nga ana e tij, i ka mohuar të gjitha lidhjet me Presidentin Vladimir Putin.
