SERBI- Ambasadori i SHBA-së në Beograd, James Hagengruber ka deklaruar se Kosova dhe Serbia duhet t’i zgjidhin vetë në mënyrë paqësore mosmarrveshjet e tyre. Balkans.aljazeera shkruan se si ish-Presidenti Donald Trump edhe Presidenti Joe Biden ndajnë të njëjtin mendim, dialogun e përbashkët të të dyja vendeve.
“Ish-Presidenti Trump gjithashtu e ka bërë këtë politikë shumë të qartë. Në vitin 2019, ai i shkruajti Presidentit Aleksandar Vuçiq për ‘mbështetjen e palëkundur’ të Shteteve të Bashkuara në thellimin e bashkëpunimit rajonal dhe veçanërisht angazhimin e tij për normalizimin e marrëdhënieve me Kosovën. U takon të dy palëve të arrijnë një marrëveshje të cilën dy palët mund ta mbështesin”, tha Hagengruber.
Ndërkohë që një zëdhënës tjetër i ambasadës Amerikane në Serbi u shpreh se një marrëveshje me Kosovën do të ishte me përmasa historike dhe se do të rriste Serbinë ekonomikisht.
“Një marrëveshje e tillë historike, me njohje të ndërsjellë në thelbin e saj, do të ndërtonte rrugën drejt qëllimeve të integrimit evropian dhe rritjes ekonomike të Serbisë”,tha ai.
