Një nga çështjet e para të sjella në vëmendje nga Drejtori i ri Përgjithshëm i Policisë së Shtetit pas marrjes së detyrës ka qenë problemi i kompanive të angazhuara në skema mashtrimi nëpërmjet investimit në bursa.
Këto kompani veprojnë si agjentë të platformave të huaja të investimit dhe synojnë të tërheqin në investime sidomos shtetas të huaj. Në parim, ato funksionojnë si kompani call center, që kontaktojnë klientë potencialë nëpërmjet telefonit. Aktiviteti i shumicës së tyre është i jashtëligjshëm, madje, sipas dëshmive nga punonjës, disa syresh angazhohen në skema të mirëfillta mashtrimi, ku synimi nuk është thjesht përfitimi i komisionit mbi një investim real, por zhvatja e fondeve të investitorëve.
Kompani që, në rastin më të mirë shkelin ligjin duke ushtruar aktivitet financiar të palicencuar dhe rastin më të keq konsumojnë veprën penale të mashtrimit, prej vitesh po tolerohen nga strukturat ligjzbatuese. Këto kompani punësojnë mijëra të rinj dhe për ata që janë më të aftë në joshjen e investitorëve mundësojnë pagesa tejet të mëdha, që shpesh mund të arrijnë në dhejtëra mijëra euro në muaj. Por, denoncimet e përcjella së fundi nga jashtë vendit, prej shtetasve të huaj që kanë denoncuar mashtrimin prej këtyre kompanive, së fundmi kanë sjellë një valë kontrollesh për të zbuluar subjektet në shkelje të ligjit.
Në mbledhjen e fundit të muajit tetor, këtij problemi i është kthyer edhe Autoriteti i Mbikëqyrjes Financiare (AMF). Me një vendim të Bordit Drejtues, AMF i ka hequr licencën edhe një prej kompanive të pakta të licencuara si agjent i platformave të huaja. Vendimi parashikon heqjen e njohjes dhe çregjistrimin e shoqërisë “OnTop-Securities” sh.a., si agjent i lidhur i brokerit të huaj. AMF nuk ka bërë publike argumentin e vendimit dhe arsyet pse këtij operatori i është hequr licenca. Pas këtij vendimi, në regjistrin e subjekteve të licencuara të AMF tashmë kanë ngelur vetëm dy të tilla që ushtrojnë veprimtarinë e agjentit në mënyrë të ligjshme, Prodata Securities sh.a. dhe Validius sh.a.
Por, ndërkohë AMF ka dhënë një licencë të re për shërbimet e investimit online: këtë herë bëhet fjalë për një institucion financiar të rëndësishëm dhe me eksperiencë, Bankën Kombëtare Tregtare. BKT do të ofrojë shërbimin e investimit nëpërmjet platformës online Smart Invest. Banka e ofron të njëjtin shërbim edhe nëpërmjet filialit të saj në Kosovë. Ndryshe nga kompanitë call center që tentojnë të tërheqin sidomos shtetas të huaj, BKT synon ta ofrojë investimin në bursë për klientët e saj. Sipas informacionit në faqen e BKT Kosovë, “Smart Invest” është një platformë e investimeve, e cila ofron qasje në Tregjet Financiare Ndërkombëtare. “Smart Invest” do iu ofron klientëve të BKT qasje të drejtpërdrejtë në produkte si Forex, mallra, aksione, indekse të aksioneve, ETF (exchange traded funds) dhe CFD (contract for differences). Një pjesë e këtyre produkteve, në fakt, nuk janë shumë të ndryshme nga ato që promovojnë edhe kompanitë call center në Shqipëri.
Përdorimi i platformës në Kosovë parashikon një vlerë minimale të transferimit të fondeve për 1 mijë eurosh. Banka në këtë rast përfiton komisione të konsiderueshme, zakonisht si përqindje ndaj vlerës së investimit (0.1% në shumicën e rasteve), por komisioni ka një vlerë minimale që përgjithësisht lëviz në rendin mes 12 dhe 15 eurove. Me sa duket, ky shërbim targeton depozituesit e mesëm dhe të mëdhenj, që mund të jenë të interesuar për investime me norma kthimi më të larta, por që kanë edhe rrezik shumë më të madh.
Marrë nga Monitor.al
