Agjencia e Prokurimit Publik njoftoi të gjithë autoritetet kontraktore se çdo procedurë prokurimi e tyre duhet të bëhet me mjete elektronike me përjashtim të fazës vijuese për katër procedura të veçanta. Ky njoftim i APP vjen fill vendimit të Këshillit të Ministrave pikërisht mbi formën e komunikimit në procedurat e prokurimit.
Forma shkresore e komunikimit sipas këtij vendimi mund të përdoret vetëm në fazën vijuese pas fazës së para kualifikimit në procedura të tilla si “Dialog konkurrues”, “Partneritet për inovacion”, “Konkurruese me negocim” dhe “Konkurs projektimi”. I njëjti vendim parashikon që edhe procedura për shërbime konsulence të zhvillohet në çdo etapë në formë elektronike duke eliminuar pjesën shkresore.
“Agjencia e Prokurimit Publik njofton të gjitha palët e interesuara se, në mbështetje të pikës 1 të nenit 17 te Ligjit nr. 162. date 23.12.2020 “Për prokurimin publik”, Këshilli i Ministrave ka miratuar Vendimin Nr. 384 datë 30.06.2021. Për formën e komunikimit në procedurat e prokurimit publik “,
Sipas këtij vendimi të gjitha procedurat e prokurimit do të zhvillohen me mjete elektronike përveç fazave vijuese, pas fazës së parakualifikimit, të procedurave të prokurimit “Dialog konkurrues”, “Partneritet për inovacion”, “Konkurruese me negocim” dhe “Konkurs projektimi”, të cilat do të zhvillohen në formë shkresore.
Sjellim në vëmendje se, një risi që sjell ky vendim është edhe fakti se procedura e prokurimit
“Shërbim Konsulence” do të zhvillohet në të gjitha fazat e saj me mjete elektronike.
Ky vendim i cili është publikuar në Fletoren Zyrtare Nr.106 datë 06.07.2021, hyn menjëherë në fuqi” njoftoi APP.
Kohëve të fundit ka një sërë vendimesh të qeverisë që lidhen me procedurat e prokurimit dhe që vijnë në plotësim të ligjit të ri të prokurimeve që ka hyrë në fuqi prej pak kohësh.
Marrë nga Monitor.al
