Kapitalizimi i sektorit bankar i ka kaluar me sukses provat e radhës së rezistencës të ushtruara nga Banka e Shqipërisë në skenarin bazë.
Megjithatë, provat treguan se banka të veçanta mund të kenë nevojë për injektime kapitali nga fundi i këtij viti, në rast se do të materializohet skenari i moderuar ose ai i rënduar i supozuar nga Banka e Shqipërisë.
Në skenarin bazë, raporti i mjaftueshmërisë së kapitalit (RMK) të sektorit bankar paraqitet i qëndrueshëm dhe mbi vlerën faktike të fundit të gjashtëmujorit të parë 2021 (17.95%). Ky skenar mbështetet në supozimet për një rritje të kreditimit për vitin 2021, përmirësimin e mëtejshëm të portofolit të kredisë me probleme dhe ecurinë e favorshme të kursit të këmbimit. Konkretisht, raporti i mjaftueshmërisë së kapitalit do të arrinte në 18.6% në fund të vitit 2021 për gjithë sektorin bankar. Për bankat sistemike, kjo normë do të ishte 19.5%, ndërsa për bankat e tjera do të prekte nivelin 16.2%. Skenari bazë parashikon nivele të larta të kapitalizimit për të gjithë sektorin bankar dhe për bankat individuale, duke marrë në konsideratë nivelin minimal të kërkuar dhe kërkesat rregullative shtesë, të llojit makroprudencial.
Skenari i moderuar mbështetet në supozimet për një ritëm më të ulët rritjeje të aktivitetit ekonomik dhe të kredidhënies, nënçmim të monedhës vendase, përkeqësim të cilësisë së portofolit të kredisë dhe humbje nga portofoli në tituj. Në këtë skenar, RMK për sektorin bankar do të shënonte një nivel prej 14.7% në fund të vitit 2021. Ky raport për bankat sistemike do të rezultonte 15.5%, ndërsa RMK për bankat e tjera 12.3%. Në nivele mesatare, këto norma janë brenda kërkesave rregullative të përcaktuara, por rezultatet në banka të veçanta evidentojnë edhe nevojën për injektim kapitali gjatë këtij viti. Më konkretisht, numri i bankave që paraqiten të nënkapitalizuara për këtë skenar në fund të vitit 2021 është shtatë dhe aktivet e këtyre bankave zënë rreth 62% të aktiveve të sektorit. Në këtë rast, nevoja për kapital shtesë vlerësohet të jetë rreth 16.3 miliardë lekë.
Në skenarin e tretë, atë të rënduar, zhvillimet e supozuara makroekonomike të përfshira në të do të ndikonin në një ritëm më të ulët rritjeje të kreditimit dhe në përkeqësimin e mëtejshëm të cilësisë së portofolit të kredisë. Ky skenar supozon gjithashtu një humbje në portofolin e titujve dhe një rritje të ekspozimit ndaj rrezikut operacional. Ndonëse supozimet e përfshira në këtë skenar janë mjaft ekstreme, në skenarin e rënduar, RMK për sektorin bankar do të binte në 12.7% në fund të vitit 2021. Për bankat sistemike, RMK në këtë skenar do të rezultonte 13.4%, ndërkohë që për bankat e tjera kjo normë bie në 10.5%. Numrit të bankave që bien në nënkapitalizim në krahasim me skenarin e moderuar u shtohet edhe një bankë, ndërkohë që normat e kapitalizimit të tyre bien edhe më tej. Në këtë rast, nevojat për kapital shtesë arrijnë në 31.7 miliardë lekë.
Marrë nga Monitor.al
