Kryetari i Partisë Demokratike, Lulzim Basha ka takuar disa përfaqësues të biznesit në qytetin e Durrësit. Teksa është ndalur në një biznes, ai ka dëgjuar ankesat e një sipërmarrës i cili është shprehur:
“Nga fillimi i pandemisë, të ardhurat kanë rënë me 25%-30%. Ne paguajmë energjinë elektrike më të shtrenjtë në rajon. I gjithë rajoni paguan 5 cent për kilovat, madje disa vende kanë dhe subvencionime për biznesin. Kostot po rriten çdo ditë, nuk kemi para për të rritur pagat e punëtorëve”. Ndërkohë kreu i demokratëve është shprehur se me ardhjen në qeveri të PD, prioritet do të jetë çmimi i karburantit dhe i energjisë të cilat do të jenë të paktën me nivelet e rajonit. Sipas Bashës, e vetmja gjë që duhet të bëjë shteti, të mos bllokojë rrugën e biznesit.
