Kryetari i opozitës, Lulzim Basha, bëri disa komente interesante në Çim Peka LIVE kur u pyet për raportet e tij me ndërkombëtarët.
I pyetur nëse Uashingtoni dhe Berlini e shohin si partner në qeverisje, Basha tha se “partnerët tanë ndërkombëtarë na kanë dhënë të drejtë në çdo betejë që kemi zhvilluar”.
“Pa largimin e Edi Ramës, reforma në drejtësi nuk do ketë sukses. Ai është investuar për ta kapur këtë reformë. Ai është pengesa kryesore për arsye që i kupton çdokush,” tha Basha.
Sipas tij, qeveria e re nuk do e ketë nën kontroll drejtësinë
“Ndryshimi politik i 25 prillit është një garanci edhe për ata që kanë investuar në reformën në drejtësi, pasi do kenë një qeveri që nuk ka futur duart në këtë reformë. Ndryshimi më 25 prill është një garanci që reforma, e cila sot është në gjendje kritike, të ringjallet dhe të përparojë. Askush nuk mund të akuzojë qeverinë time që kontrollon drejtësinë.
Ne do u kthehemi angazhimeve që kemi marrë përpara partnerëve dhe shqiptarëve që reformën ta bëjmë ashtu siç është parashikuar në Kushtetututë dhe jo siç është deformuar,” tha Basha, i cili më herët tha se reforma në drejtësi ishte e vonuar.
