Qeveria ka vendosur të hapë sërish një procedurë për kalimin tek investitorët e interesuar për kërkim-zbulim nafte të Bllokut të lirë të Panajasë.
Me një urdhër të Ministres së Infrastrukturës dhe Energjisë Belinda Balluku është Agjencia Kombëtare e Burimeve të Natyrës ajo që ka bërë të ditur se tashmë ky bllok është nxjerrë për shprehje interesi. Kjo nuk është hera e pare që AKBN bën shpalljen për këtë Bllok, diçka e ngjashme ka ndodhur edhe në vitin 2016 dhe 2019 por pa arritur që të finalizohet një marrëveshje me investitorë të interesuar.
Blloku i tretë ai i Panajasë ndodhet në pjesën jug perëndimore të Shqipërisë, rreth 3km në veri të qytetit të Vlorës. Sipërfaqja e Bllokut është 312 Km2. Janë kryer 456 km profile sizmikë nga Albpetrol gjatë periudhës 1975-1990, të cilët janë ripërpunuara nga INA NAFTAPLIN gjatë vitit 2000. Gjithashtu janë kryer 160 km punime të reja sizmike nga INA NAFTAPLIN në vitin 2001, me kohë maksimale regjistrimi 8 sek.
Puset Kryesorë në këtë bllok janë Zvërneci-3, Dajlani-1, Vlora-10 dhe Vlora-11 . Duke marrë për llogaritje vlerat limit të përdorura për vlerësimin e rezervave, rezulton se këto të fundit luhaten nga 25 Milionë fuçi naftë (varianti më minimal) deri në 101 milionë fuçi.
Periudha e kërkimit sipas termave të nxjerra nga AKBN është 5 vjeçare për çdo kompani që fiton të drejtën ndërkohë që kjo mund të shtyhet 7 vjeçare. Në rast zbulimi tregtar, periudha e zhvillimit dhe prodhimit e zonës do të jetë njëzet e pesë vjet dhe mund të zgjatet më tej siç parashikohet në ligjin respektiv.
Kushtet për mbulimin e kostos, kufirin e kostos, faktorin R dhe ndarjen e naftës do të specifikohen nga kontraktori në aplikimin e tij, subjekt i negociatave me AKBN-në përpara nënshkrimit të Marrëveshjes.
Agjencia ka nënvizuar se në çdo rast pas shqyrtimit të aplikimit të marrë, kjo e fundit do të ftojë për negocim aplikantët në kohën e duhur.
“Është synimi i AKBN-së që pasi të negociohen kontratat dhe të jetë rënë dakord nga të dyja palët, ato do të hyjnë në fuqi sa më shpejt që të jetë e mundur” thuhet në dokumentin e AKBN.
