BRITANIA E MADHE- Kryeministri i Mbretërisë së Bashkuar, Boris Johnson, ka deklaruar se nuk beson, se gratë transgjinore duhet të konkurrojnë në ngjarjet sportive të femrave. Sipas BBC, kjo pikëpamje nga ana e tij mund të jetë “e diskutueshme”. Johnson ka thënë se atletet femra transgjinore nuk duhet të marrin pjesë në sportet e grave. Ai u shpreh se ky është mendimi i tij rreth kësaj çështje.
“Unë nuk mendoj se ata që kanë lindur meshkuj duhet të konkurrojnë në ngjarjet sportive të femrave. Ndoshta kjo është një gjë e diskutueshme për të thënë, por thjesht më duket se është e arsyeshme. Gjithashtu mendoj se gratë duhet të kenë hapësira qofshin ato në spitale, burgje apo dhoma zhveshjeje, të cilat u dedikohen grave. Ky është mendimi im për këtë çështje. Nëse kjo më vë në konflikt me disa të tjerë, atëherë duhet t’i zgjidhim të gjitha. Nuk do të thotë se jam kundra njerëzve që duan të ndryshojnë gjininë,”-tha Johnson.
Çështja e atleteve transgjinore e përqendruar rreth përfshirjes dhe të drejtës sportive, sigurisë në sportin e grave është fokusuar së fundmi në rastin e çiklistes transgjinore Emily Bridges. Kjo e fundit u shpall kohët e fundit e papërshtatshme për të konkurruar në garën e saj të parë elitare për femra.
