Tetori rezulton të ketë qenë muaji më i rëndë për pandeminë e kovidit-19, me më shumë se 500 mijë të infektuar të raportuar përditë në nivel botëror gjatë javës së shkuar.
Bilanci i të prekurve nga koronavirusi i ri u rrit në fundjavë në 50 milionë njerëz, ndërsa mbi 1 milion e 250 mijë të tjerë nuk i mbijetuan dot infeksionit vdekjeprurës.
Amerika, India dhe Brazili përfaqësojnë gati gjysmën e totalit të të infektuarve.
Më shumë se 237 mijë veta kanë humbur jetën vetëm në SHBA dhe presidenti i sapozgjedhur, Xho Bajden, nuk ka vonuar që të thërrasë një task-forcë për të frenuar krizën epidemike.
Nga Azia, Kina raportoi në fundjavë vetëm 1 rast të infektimit lokal dhe 32 të ardhur nga jashtë.
Në Europë, liderët e vendeve kryesore si masa të menjëhershme kanë vlerësuar rikthimin e pjesshëm të karantinës për qytetarët por edhe për aktivitetet ekonomike.
Kontinenti europian me 12 milionë rastet e veta është rajoni më i goditur nga pandemia, duke ia kaluar Amerikës Latine, dhe bilanci po rritet me gati 1 milion të infektuar të rinj çdo tri ditë.
Në Itali, Urdhri i Mjekëve ka kërkuar izolim total të vendit pasi situata në spitale po merr përmasa dramatike dhe parashikohen deri 10 mijë viktima të tjera gjatë muajit.
Rajonet nga veriu në Lombardi te Kampanja në jug kryesojnë rastet të cilat u rritën te dielën me 30 mijë, ndërsa më shumë se 330 ishin jetët e humbura.
26 të vdekur raportoi brenda 24 orëve edhe Maqedonia Veriore, 730 të diagnostikuar të rinj u shënuan në Kosovë pas ndalimqarkullimit të fundjavës, ndërsa Greqia fqinje, përveç shkollave fillore, marketeve dhe farmacive, po aplikon karantinën kombëtare për herë të dytë pas marsit.
Greqia regjistroi të dielën një rekord prej 35 viktimash ndërsa nga analizimi i ujërave të zeza, rezulton se bartës aktivë të koronavirusit janë më pak se 2 për qind e banorëve të kryeqytetit.
