Depozitat bankare shënuan një rritje shumë të vogël gjatë muajit maj, duke konfirmuar një tendencë ngadalësimi në gjysmën e parë të këtij viti.
Sipas Bankës së Shqipërisë, depozitat e përfshira në përkufizimin e parasë së gjerë arritën vlerën e 1.228,5 trilionë Lekësh, me një rritje prej prej vetëm 300 milionë lekësh (rreth 2.5 milionë Euro) krahasuar me muajin prill.
Depozitat e përfshira në paranë e gjerë sidooqftë përjashtojnë disa kategori të depozitave, si për shembull ato të qeverisë qendrore, të jorezidentëve, depozitat e ndërsjellta mes bankave dhe ato me maturitet mbi dy vjet.
Depozitat po vazhdojnë të ruajnë ritme pozitive të rritjes vjetore, me 8.2% krahasuar me majin e vitit të kaluar. Megjithatë, në fund të vitit 2021 ritmi i rritjes vjetore kishte qenë ndjeshëm më i lartë, me 9.3%.
Rritja e vogël e mujore e majit erdhi nga depozitat në valutë të huaj, ndërkohë që depozitat në Lekë ishin pothuajse në të njëjtën vlerë me muajin prill. Rritja u përcaktua kryesisht nga depozitat pa afat të biznesve. Depozitat në valutë të huaj janë gjithnjë e më dominuese, me 56% të totalit të depozitave të përfshira në paranë e gjerë.
Muaji i fundit që depozitat bankare kanë shënuar një rritje të mirëfilltë ishte janari. Më tej, depozitat kanë lëvizur me rënies dhe stanjacionit.
Frenimi i rritjes së depozitave bankare përputhet me periudhën e rritjes së shpejtë të inflacionit, që zyrtarisht ka arritur nivelin 6.7%, niveli më i lartë prej më shumë se 20 vjetësh. Rritja e ndjeshme e çmimeve, sidomos të produkteve ushqimore dhe karburanteve mund ta ketë kufizuar aftësinë e familjeve shqiptare për të kursyer.
Në një masë të vogël, ngadalësimi i depozitave mund të jetë ndikuar edhe nga efekti statistikor i kursit të këmbimit. Leku po ndjek një tendencë graduale mbiçmimi ndaj Euros, që ka zbritur në nivelet më të ulëta historike. Ky mbiçmim ka ndikuar disi në uljen e vlerës së depozitave në valutë, që për qëllime statistikore raportohen në Lekë.
Megjithatë, në muajt në vijim pritshmëritë për ecurinë e depozitave mund të jenë më pozitive, për shkak të fakorit sezonal. Sezoni veror është një periudhë e vitit që historikisht shoqërohet me shtim të flukseve të depozitave bankare. Kjo tendencë ka qenë fillimisht e lidhur me kthimin e emigrantëve dhe kursimet e tyre, por në vitet e fundit një ndikim në rritje po sjellin edhe të ardhurat nga turizmi hyrës. Për këtë arsye, tre muajt e verës mund të ndikojnë në një ritëm të përmirësuar të depozitave bankare.
Të dhënat e deritanishme tregojnë se turizmi hyrës po kalon edhe nivelet e parapandemisë. Për pesë muajt e parë të vitit, numri i turistëve të huaj që kanë hyrë në vend ishte 12% më i lartë krahasuar me të njëjtën periudhë të vitit 2019.
Burimi: Banka e Shqipërisë
Marrë nga Monitor.al
