GREQI- Mesazhi optimist se Greqia do të hap dyert e turizmit më 14 maj është dhënë nga ministri i turizmit Haris Theocharis.
Sigurisht që ai nuk ka harruar se bota është përfshirë nga një valë pandemie që ka kufizuar dhe shndërruar jetën e secilit prej nesh, ndaj edhe rihapja e turizmit në vend do të jetë me kufizime.
Theocharis tha se çdo udhëtar i cili do të vizitojë Greqinë, duhet të jetë negativ në testin e COVID ose të ketë kryer vaksinën. Ndërsa masat anti-COVID t cilat janë në fuqi për qytetarët grekë, do të jenë edhe për çdo person i cili viziton Greqinë.
Deklaratën e tij për rihapjen e dyerve të turizmit në vend e dha nga muzeu më historik dhe i vizituar grek “Akropolis”, në kryeqytet.
“Turizmi na bashkon të gjithëve. Sot më jep kënaqësi të madhe t’ju flas nga Muzeu i Akropolit, një nga muzetë më të mëdhenj në botë, me ekspozita unike që nëse gjithçka shkon sipas planit, të gjithë do të mund ta shihni nga afër gjatë gjithë verës”, tha ai.
Ai me këtë deklaratë përmes sloganit “Gjithçka që të duhet është Greqia”, ka bërë një ftesë për të gjithë që ta vizitojnë atë.
Vaksinimi në Greqi ka nisur më 28 dhjetor të 2020 si në shumicën e vendeve evropiane dhe fushata po ecën siç duhet.
Kryeministri i vendit u shpreh optimist duke thënë se janë vaksinuar mbi 1 milionë qytetarë dhe çdo gjë po ecën sipas planit të parashikuar.
Pavarësisht masave aktuale shtrënguese në fuqi dhe procesit të vaksinimit i cili po ecën siç duhet, në Greqi kohët e fundit numri i infektimeve dhe viktimave ka pësuar një rritje.
