Teksa në Kosovë zerohen tarifat e studentëve dhe lehtësohet jetesa e studentëve, në Shqipëri diskutimi bëhet për vaksinimin e detyrueshëm dhe askush nuk i kushton rëndësi masave lehtësuese për studentët.
I ftuar në studion e ‘Ekonomi Plus’ Ekspert i Arsimit, Ndriçim Mehmeti përballë moderatores Klaudja Karabolli shprehet se situata në vend vijon të jetë kritike dhe se qeveria nuk e shikon me prioritet gjetjen e një mase lehtësuese për studentët.
“Situatë e vështirë dhe kaotike. Pakti që do ndryshonte jetën studentore u la pas, por po flitet vetëm për vaksinimin. Sipas INSTAT po hiqet buka për të paguar studimet. E drejtë kushtetuese që mbrohet me ligj, por ne nuk po e konsiderojmë si të tillë. 50 euro në muaj i duhen një studenti në konvikte, pra 500 euro në muaj. Shteti nuk mbështet në asnjë mënyrë, dhe familjet shqiptare paguajnë për një arsim që nuk e merr kurrë. Arsimi jonë në Shqipëri shkon 3800-4500 euro në vit. Më mirë ta nisësh fëmijën jashtë, ital, Gjermani apo Kosovë. Godinat studentore në Kosovë janë 10- 15 euro ne i kemi 50 euro në muaj. Jemi në kushte kur ne nuk krahësohemi dot me Kosovën, edhe pagat e pedagogëve ne jemi mjeranë në të gjitha kushtet. Me 2,9 % të GDP nuk ke ku shkon”
Eljon Mulgeci, student i programit Master tregon sa e vështirë është jeta e një studenti në një metropol si Tirana edhe tregon se përse do të zgjidhte Prishtinën për të kryer studimet nëse do i jepej mundësia.
“Të jesh një student këtu nuk është e lehtë. Duhet falenderuar Kurti për zerimin e tarifave Bachelor edhe Master. pagesat, tarifat dhe çmimet e larta e vështirësojnë jetesën e një studenti në vend. Situata ka qenë dhe është e vështirë. Nëse do e kisha mundësinë do të vazhdoja studimet në Prishtinë. I vetmi problem do të mbetej akreditimi i programeve të ndryshme të studimeve.”
