BRITANI E MADHE- Shqiptari Ergys Koçi, 36 vjeç, është gjetur i vdekur në Haringey të Britanisë së Madhe. Mësohet se shqiptari ishte gjetur i pajetë në rrugë me lëndime të shumta në trup që i kishin kushtuar dhe jetën. Autopsia mjeko-ligjore zbuloi se shkaku i vdekjes ishte trauma në kokë dhe kishte disa plagë që kishte marrë nga një thikë, ndërkohë që ende nuk dihen detaje të tjera.
“Metropolitan Police” ka publikuar foton e tij, duke dhënë edhe detajet e para zyrtare në lidhje me vrasjen e tij, ndërsa kanë bërë me dije se për vrasjen është ndaluar një tjetër shqiptar, i cili dyshohet se është atentatori. Bëhet fjalë për Briken Qunin, 42 vjeç, pa adresë fikse në Britani të Madhe, i cili akuzohet për vrasjen e shqiptarit, por nuk dihet shkaku i vrasjes.
Quni do të dalë para gjykatës më 28 shtator për t’u njohur me masën e sigurisë ndaj tij, ndërkohë që hetuesit po punojnë për zbardhjen e plotë të ngjarjes, ndërsa kanë nisur me kontrollin e kamerave të sigurisë, të cilat do të zbardhin edhe dinamikën e plotë.
