Islandë- Një ngjarje e rëndë ka ndodhur mbrëmjen e së shtunës, ku një shqiptar është ekzekutuar me armë jashtë shtëpisë së tij në Reykjavík, Islandë.
Mësohet se viktima e atentatit është Armando Beqiri i cili më 16 shkurt do të kishte mbushur 33 vjeç. Armando u gjet i shtrirë dhe i mbuluar në gjak në derën e shtëpisë së tij, i cili ndërroi jetë pa mbërritur në spital për shkak të plagëve të shumta që mori nga plumbat, në qafë dhe shpinë.
Mediat islandeze kanë zbardhur detaje në lidhje me vrasjen e shqiptarit, i cili mendohet se kishte parkuar makinën dhe po hynte në shtëpi rreth orës 23:57 kur u qëllua me armë. Autori i kishte bërë pritë në prag të shtëpisë duke e qëlluar disa herë. Gruaja e tij shtatzënë dhe fëmija tjetër 15 muajsh ishin brenda në shtëpi gjatë atentatit. Pavarësisht dërgimit me shpejtësi në spital, ai nuk mundi t’u mbijetonte plagëve.
Por kush është shqiptari që u vra?
Armando Beqiri nga Shqipëria arriti në Greqi në vjeshtën e vitit 2012. Dy vite më vonë në ditën e Krishtlindjes, ai zbarkon në Islandë. Në profilin e tij në Facebook, ai shkruante se fliste tre gjuhë të huaja. Ai ishte pronar i një kompanie sigurie fizike, që kishte pasur sukses të menjëhershëm në Islandë. Deri tani janë mister motivet e vrasjes, pasi miqtë e tij shprehen se shqiptari ishte punëtor, i ndershëm dhe miqësor.
Për vrasjen e tij deri më tani janë arrestuar tre persona, dy të huaj dhe një islandezë, ndërsa një tjetër i dyshuar po mbahet në paraburgim pasi dyshohet se ka pasur lidhje me vrasjen.
