Shoqëria e sigurimeve Eurosig njoftoi se ka marrë paketën kontrolluese të Bankës së Bashkuar të Shqipërisë (UBA Bank), me 51% të aksioneve.
Në gusht 2019, Eurosig hyri për herë të parë si aksionere te UBA bank, që deri në atë kohë ishte 100% me kapital të huaj, ku shumicën e zotëronte Islamic Development Bank. Në atë kohë Eurosig bleu 21% të aksioneve, të UBA bank, ndërsa tashmë Eurosig njoftoi se ka marrë paketën kontrolluese.
Transaksioni nuk është regjistruar ende në Qendrën Kombëtare të Biznesit dhe nuk ka marrë ende miratimin e Bankës së Shqipërisë. Kjo e fundit tha se aktualisht, të miratuara nga BSH, Eurosig ka 21.2% të aksioneve.
UBA Bank ka hyrë në tregun shqiptar që në vitin 1999, por pesha e saj në tregun shqiptare ka mbetur modeste. Ajo ka vepruar në bazë të parimeve të bankingut islamik. Sipas të dhënave të Shoqatës së Bankave, në qershor 2021, UBA bank ishte më e vogla në tregun vendas, me një total aktivesh prej 10.9 miliardë lekësh, ose 0.7% të totalit të sistemit bankar. Banka ka 1.1% të stokut të kredive të dhëna nga sistemi dhe 0.7% të depozitave.
Vitet e fundit është rritur interesi i sipërmarrësve shqiptarë për të investuar në tregun financiar bankar. Pas marrjes së shumicës nga Eurosig, UBA bank bëhet e pesta me shumicë kontrolluese nga aksionerët shqiptarë. Credins Bank është banka e dytë më e madhe në vend, me 15.7% të totalit të aseteve. Tirana Bank, në pronësi të grupit Balfin, zotëronte 5.54% të tregut në fund të qershorit 2021, sipas të dhënave të Shoqatës së Bankave. Banka Amerikane e Investimeve ka 5.5%. Union Bank zotëron 4.6% të tregut. Në total, bankat në pronësi të kapitalit shqiptar përbëjnë gati 32% të totalit të aktiveve të sistemit.
Burimi: Shoqata e Bankave
Marrë nga Monitor.al
