Presidenti i Fax News, Kasem Hysenbelliu, i cili u nda nga jeta mëngjesin e të shtunës pas betejës me koronavirusin, u përcoll sot në banesën e fundit.
Paraditen e sotme, miq, të afërm e të njohur, zhvilluan homazhe në nder të tij në ceremoninë e organizuar nga familja.
Kujtimin e tij e nderuan dhe presidenti i Yldon Media Group Ylli Ndroqi së bashku me bashkëshorten e tij.
Kasem Hysenbelliu do të prehet në varrezat e Sharrës.
Hysenbelliu prej ditësh ishte duke u kuruar për Covid 19, ndërsa pak ditë më parë gjendja e tij shëndetësore ishte përkeqësuar.
Hysenbelliu prej vitesh ishte angazhuar në drejtimin e mediave, e dy vite më parë u bë themeluesi televizionin Fax News.
Më parë Hysenbelliu ka qenë administrator i News 24 duke dhënë një kontribut të çmuar në lirinë e medias, por dhe duke ofruar informacionin e duhur për publikun
Po ashtu Hysenbelliu ka qenë dhe administrator i gazetës “Panorama”, në atë kohë me tirazhin më të lartë në vend.
Hysenbelliu do të mbahet mend për komunikimin dhe bashkëpunimin jo vetëm me gazetarët por me të gjithë stafin dhe personat e angazhuar në media.
