Autoriteti i Konkurrencës ka mbyllur me kushte dhe detyrime hetimin e thelluar ndaj katër bankave më të mëdha në vend.
Në përfundim të hetimit të thelluar, Autoriteti i Konkurrencës iu ka kërkuar Bankës Kombëtare Tregtare, Bankës Credins, Bankës Raiffeisen dhe Bankës Intesa Sanpaolo të rishkojnë normat e interesit të kredive dhe depozitave, të ulin komisionet e shërbimeve të tyre dhe të zgjerojnë gamën e produkteve dhe shërbimeve online.
Megjithëse vendimi i hetimit është marrë që në datë 17 nëntor 2020, Autoriteti i Konkurrencës ende nuk e ka bërë publik, duke u kufizuar në një informacion të shkurtër në përmbajtjen e raportit vjetor që është dorëzuar në Kuvendin e Shqipërisë.
Hetimi i thelluar në sektorin bankar u hap në fillim të vitit 2019 dhe përfshinte periudhën mes 1 janarit 2016 dhe 31 dhjetorit 2018. Mbyllja e hetimit tregon se Autoriteti nuk ka provuar shkelje të ligjit “Për mbrojtjen e Konkurrencës”, megjithatë ka vendosur disa detyre, për të cilat ende nuk vë në dispozicion argumentimin e plotë. Lidhur me këtë vendim, edhe Banka e Shqipërisë bën të ditur se nuk ka shprehur ndonjë qëndrim zyrtar ndaj gjetjeve të Autoritetit të Konkurrencës.
Një tjetër vendim i marrë nga Autoriteti i Konkurrencës gjatë vitit të kaluar dhe i papublikuar ende është miratimi i blerjes së shoqërisë Tirana International Airport nga Kastrati Group. Vendimi është marrë më datë 9 dhjetor 2020, por nuk është bërë ende publik. Shoqërisë Kastrati Group i është vendosur “kusht” respektimi i nenit 9 të ligjit “Për Mbrojtjen e Konkurrencës”. As për këtë vendim AK nuk ka dhënë më shumë detaje, megjithatë ai parashikon monitorimin e sjelljes së shqoërisë në treg për një periudhë njëvjeçare.
Të tjera vendime që Autoriteti i Konkurrencës nuk i ka publikuar sipas kërkesave të ligjit është edhe mosklasifikimi si përqendrim i blerjes së shumicës së aksioneve të Bankës Amerikane të Investimeve nga drejtori ekzekutiv i saj.
Gjithashtu, Autoriteti i Konkurrencës e ka gjykuar si “sekret”, të paktën deri tani, vendimin me të cilin ka zgjedhur një zëvendëskryetar të Komisionit të Konkurrencës. Këtë pozicion prej muajit tetor e mban Leida Matja.
Marrë nga Monitor.al
