Tregu i shërbimeve të pagesave po tërheq aktorë të rinj. Vetëm këtë vit, Banka e Shqipërisë ka licencuar tre institucione të reja si emetues të parasë elektronike.
Së fundmi, janë licencuar si institucione të parasë elektronike kompanitë Rpay dhe Ereja, ndërsa në fillim të këtij viti ishte licencuar për të njëjtën veprimtari edhe kompania Paysera Albania. Me kompanitë e licencuara këtë vit, numri total i institucioneve të parasë elektronike arrin në gjashtë, duke iu shtuar subjekteve ekzistuese Union Financiar Tiranë, Posta Shqiptare dhe Easypay. Një tjetër subjekt i interesuar për t’u licencuar në këtë aktivitet është kompania estoneze IuteCredit, që aktualisht vepron në Shqipëri në tregun e mikrokredisë.
Pagesat me para elektronike i referohen transaksioneve të kryera përmes institucioneve financiare të licencuara nga Banka e Shqipërisë për këtë shërbim. Në thelb, pagesa me para elektronike është një formë pagese e ngjashme me pagesën me kartë bankare, por ndryshimi kryesor është se këto transaksione nuk kryhen përmes kartave dhe POS-eve të sektorit bankar, por nëpërmjet infrastrukturës së institucioneve të licencuara të parasë elektronike.
Këto pagesa po rriten me ritme të shpejta. Të dhënat e Bankës së Shqipërisë tregojnë se për gjysmën e parë të vitit 2021 numri total i pagesave me para elektronike arriti në 2.95 milionë, shifër kjo sa 78% e numrit të transaksioneve të realizuara gjatë të gjithë vitit 2020. E matur si mesatare mujore, deri tani gjatë vitit 2021 numri i transaksioneve ka qenë 492 mijë pagesa, ndërsa për vitin e kaluar numri mesatar mujor i transaksioneve kishte qenë rreth 316 mijë. Rritje vërehet edhe në shumën e transaksioneve me para elektronike, që mesatarisht për 6-mujorin e parë të vitit ka qenë 1.26 miliardë lekë në muaj, nga 899 milionë lekë që kishte qenë mesatarja mujore e vitit 2020.
Rritja e përdorimit të këtyre pagesave po shoqërohet edhe me një zgjerim të shpejtë të infrastrukturës teknologjike që ato shfrytëzojnë. Sipas Bankës së Shqipërisë, në mesin e këtij viti numri i terminaleve për përdorimin e parasë elektronike arriti në 2025, nga 1600 që kishte qenë në fund të vitit të kaluar. Shtimi institucioneve të licencuara në këtë treg është i lidhur edhe me miratimin e ligjit të ri “Për shërbimet e pagesave”. Ai është përshtatur në frymën e Direktivës II të Pagesave të Bashkimi Europian, do të krijojë hapësira për një konkurrencë më të madhe në tregun e shërbimeve të pagesave dhe për një zhvillim më të madh të institucioneve financiare që ofrojnë pagesa elektronike. Ligji ka hyrë në fuqi në fillim të këtij viti, por në praktikë ende nuk është i zbatueshëm, në pritje të daljes së akteve të nevojshme nënligjore, që po përgatiten nga Banka e Shqipërisë.
Marrë nga Monitor.al
