Kryetari i LDK-së, Lumir Abdixhiku, ka mbajtur një konferencë për mediat, ku ka folur në lidhje me zgjedhjen e anëtarëve të rinj të kryesisë dhe për diskutimet për situatën aktuale politike në vend.
Sipas Gazeta Express, Abdixhiku ka thënë se pas takimit me kryesin e tij, është vendosur që të vazhdojë takimi vetëm me kandidaten për presidente Vjosa Osmani, javën e ardhshme. Po ashtu, ai ka shtuar se partia e tij nuk do një presidente që nuk përfaqëson vetëm një parti, por të gjitha.
“Mbështetet iniciativa që LDK-ja të vazhdojë negociatat vetëm me zonjën Osmani si kandidate për presidente. Po pres që gjatë javës së ardhshme, zonja Osmani të caktojë ditën dhe datën e takimit. Na duhet president që I përfaqëson të gjitha partitë politike dhe jo vetëm një parti. Na duhet një president Kushtetues. Të gjitha detajet do t’i shpalosim kurdo që do të ndodh takimi. Ajo çfarë po themi vazhdimisht është që jemi të interesuar ti shmangim krizat”, ka thënë Abdixhiku.
Gjithashtu, ai ka konfirmuar dhe emrat e kryesisë dhe nënkryetarëve që janë zgjedhur, pas mbledhjes që është bërë ditën e sotme.
“ Sot kemi zgjedhur kryesinë e LDK’së në përbërje 33 anëtarësh. Kemi zgjedhur edhe nënkryetarët, Hazirin, Muhaxherin, Qunin, Shqipe Mjekiqin, e sekretarin Imri Ahmeti. Pas kësaj kemi vazhduar me mbledhjen e kryesisë së re,”-ka shtuar ai.
