Energjia ka arritur të regjistrojë tregues pozitivë sa i takon prodhimit dhe eksportit në tremujorin e dytë të vitit në raport me të njëjtën periudhë të një viti më parë. Bilanci i energjisë elektrike tregon për një kthim të normalitet të ekonomisë e lidhur kjo me konsumin ku peshën më të madhe në rritje e kanë marrë konsumatorët jo-familjarë, pra bizneset. Këta të fundit në muajt e karantinës të vitit të shkuar në një pjesë të mirë ndalën aktivitetin ose e tkurrën atë në respektim të fashave orare te levizjes duke shënuar dhe rënie të konsumit.
“Përdorimi i energjisë elektrike nga konsumatorët, në tremujorin e dytë të vitit 2021, u rrit me 17,2 % duke arritur vlerën 1.563 GWh nga 1.334 GWh që ishte në tremujorin e dytë të vitit 2020.
Ndikimin më të madh në rritjen e përdorimit të energjisë elektrike nga konsumatorët e kanë dhënë konsumatorët jo familjarë, ku kemi një rritje të konsumit të energjisë elektrike me 34,8 %, përkundrejt rritjes me 0,8 % të energjisë së konsumuar nga konsumatorët familjarë” thuhet në bilancin e energjisë për tremujorin e dytë publikuar nga INSTAT.
Paralelisht me konsumin duket se janë rritur dhe humbjet që vjen si rrjedhojë e një sasie më të lartë energjie në rrjete si në transmetim dhe në shpërndarje.
“Humbjet në rrjet arritën vlerën 400 GWh nga 310 GWh duke shënuar kështu një rritje me 29,0 %. Humbjet në transmetim janë rritur me 61,5 % ndërsa humbjet në shpërndarje janë rritur me 24,6 %.
Humbjet teknike në shpërndarje kanë shënuar një rritje me 25,5 %, ndërsa humbjet jo teknike në shpërndarje kanë shënuar një rritje me 22,9 %, krahasuar me tremujorin e dytë të vitit 2020” vlerëson INSTAT.
OSHEE sqaroi se edhe pse humbjet në vlerë absolute sipas raportimit për sektorin nga INSTAT janë në rritje kjo ka ardhur si rezultat i rritjes së sasisë së konsumit. Ndërkaq, sipas të dhënave të Operatorit të Shpërndarjes së Energjisë Elektrike, rezulton se per 6 mujorin e pare te vitit 2021, humbjet në shpërndarje janë reduktuar. Nëse vitin e kaluar ato ishin 22.84%, për këtë vit humbjet në shpërndarje jane reduktuar në 22.3% duke qene brenda parashikimeve dhe objektivave vjetor.
I njëjti nënvizon se gjatë tremujorit të dytë të vitit 2021, energjia elektrike në dispozicion u rrit me 19,4 %. Prodhimi neto vendas i energjisë elektrike në këtë periudhë u rrit me 2,2 herë duke arritur vlerën 2.660 GWh nga 1.188 GWh energji të prodhuar në tremujorin e dytë të vitit 2020.
“Ky prodhim u realizua nga hidrocentralet publike në masën 58,5 %, nga hidrocentralet private dhe koncensionare në masën 41,0 % dhe nga të tjerë prodhues (energji e rinovueshme) në masën 0,5 % të prodhimit neto vendas të energjisë elektrike.
Importi bruto i energjisë elektrike (energji në marrje), në tremujorin e dytë të vitit 2021, arriti vlerën 228 GWh nga 681 GWh që ishte në të njëjtën periudhë të një viti më parë, duke shënuar kështu një rënie me 66,5 %. Eksporti bruto i energjisë elektrike (energji në dhënie) arriti vlerën 924 GWh nga 224 GWh duke shënuar një rritje me 4,1 herë” thuhet në raportin e bilacit.
Sipas INSTAT hidrocentralet publike, në tremujorin e dytë të vitit 2021, prodhuan 1.557 GWh nga 571 GWh të prodhuar në tremujorin e dytë të vitit 2020, duke shënuar kështu një rritje të prodhimit me 2,7 herë.
Nga ana tjetër hidrocentralet private dhe koncensionare, prodhuan 1.090 GËh nga 607 GWh të prodhuar në të njëjtën periudhë të një viti më dytë, duke shënuar një rritje të prodhimit të energjisë elektrike me 79,7 %.
“Shkëmbimi i energjisë elektrike (diferenca mes eksportit dhe importit bruto të energjisë), në tremujorin e dytë të vitit 2021, ka pësuar një rritje duke arritur vlerën 696 GWh krahasuar me tremujorin e dytë të vitit 2020 ku kishte nje vlerë negative prej 457 GWh” thuhet në publikimin e INSTAT.
Marrë nga Monitor.al
