Kryeministri i Kosovës Albin Kurti zhvilloi sot një takim me Shefen e Zyrës Ndërlidhëse greke në Kosovë Heleni Vakali.
Gjatë takimit Kurti foli rreth marrëdhënieve të mira mes dy vendeve dhe rritjes së shkëmbimeve tregtare, bashkëpunimit në ekonomi dhe në investime .Kurti kërkoi që Greqia t’i bashkohej shumicës së shteteve të Bashkimit Evropian dhe të njohë pavarësinë e Kosovës.
Sipas zyrës së Kryeministrit, Vakali tha se Greqia edhe pse ende nuk e njeh pavarësinë e Kosovës ka arritur të zhvillojë marrëdhënie bilaterale. “Ambasadorja Vakali tha se është e nderuar për detyrën që ka marrë dhe se Greqia është mike e sinqertë dhe e fuqishme e Kosovës. Edhe pse ende nuk e njeh pavarësinë e Kosovës, Greqia ka arritur të zhvillojë marrëdhënie bilaterale pa kurrfarë problem, theksoi znj. Vakali. Ajo u shpreh e impresionuar me potencialin e madh që ka Kosova dhe mundësitë që ekzistojnë për bashkëpunimin bilateral. Ambasadorja e vlerësoi angazhimin e qeverisë për vlera demokratike dhe për rezultatet në luftimin e korrupsionit”, thuhej në komunikimin zyrtar.
Kryeministri Kurti dhe ambasadorja Vakali ranë dakord që duhet të vazhdojnë projektet e përbashkëta në arsim e kulturë dhe në organizimin e radhës të forumit ekonomik.
