Me siguri të gjithë ju që keni akses në rrjetet sociale, e njihni tashmë historinë e një mësuesi nga Vushtrria, Lulzim Paci, i cili u bullizua sepse postoi një video në TikTok ndërsa ishte duke kërcyer valle tradicionale shqiptare.
Menjëherë pas videos, e para që nxitoi ta ndëshkonte mësuesin e Biologjisë në gjimnazin “Eqerem Çabej” në Vushtrri ishte deputetja e Lëvizjes VetëVendosja, Fjolla Ujkani, e cila, pas revoltës së rrjetit, u detyrua të kërkojë falje publike.
“Të dashur qytetarë të Vushtrrisë, në veçanti juve nxënës të gjimnazit ‘Eqrem Çabej’- Vushtrri, dhe juve prindër. Ditëve të fundit njëri nga profesorët e gjimnazit ‘Eqrem Çabej’ është duke publikuar video të tij, të cilat janë veprime të pahijshme dhe degjeneruese. Andaj, i bëj thirrje drejtorit të gjimnazit dhe drejtorisë së Arsimit në Vushtrri, që të marrin masa ndaj profesorit në fjalë. Sepse veprimet tij përmes videove lënë të kuptojnë, që një profesor i tillë nuk mund të arsimojë dhe edukojë kategorinë më të çmueshme të shoqërisë, rininë tonë” – ishte mesazhi i Ujkanit, por pak kohë më vonë, iu desh ta tërhiqte e të kërkonte ndjesë.
Vetëm pak ditë për shpërthimit të rrjetit, Paci ka qenë i ftuar në disa programe televizive për të rrëfyer eksperiencën e tij pas një videoje që, më shumë se gjithçka tjetër, tregon vlera të vërteta kombëtare.
‘Nëse edhe vallëzimi me valle kombëtare është antivlerë, unë ndoshta jam gabim, kërkoj falje publike… “ – tregon i përlotur Paci, ndërsa ndan me të gjithë shqetësimin e së ëmës, të cilën kishte dy ditë pa e parë pikërisht prej presionit të të gjithëve: “Po çfarë ke bërë more bir?” e kishte pyetur ajo pasi kishte dëgjuar nga të gjithë se djali “paskësh bërë hatanë”.
Mësuesi Lulzim Paci ishte i ftuar edhe në “Ftesë në 5” me Bieta Sulon, nga ku ndau më shumë detaje nga jeta e tij, por edhe kërceu live para publikut duke gëzuar mbështetjen e të gjithëve. Paci tregoi se punon prej 18-vjetësh si arsimtar. Ai ka marrë mbështetjen maksimale të shumë artistëve nga Shqipëria e Kosova, të cilët kanë vetëm një hashtag për momentin #meprofen dhe #profachallenge.
