GREQI- Ministri i Mbrojtjes së Turqisë, Hulusi Akar, ka provokuar me deklaratën e tij, teksa fliste në zyrën turke në Libi. Në një deklaratë për mediat ai ka thënë se pavarësisht nga gjendja e dobët ekonomike e Turqisë, Greqia është angazhuar në një garë armatimesh, por numri i avionëve dhe anijeve që ka në plan të marrë nuk është i mjaftueshëm për t’u përballur me Turqinë.
“Pavarësisht nga problemet edhe nuk kanë për të ngrënë, pirë, veshur, pavarësisht nga ulja e pagave dhe kostoja e jetesës së popullit grek, ata janë kënaqur në një mënyrë të furishme për armatimet. Blini sa të dëshironi anije, aeroplanë dhe nëndetëse, ato nuk mjaftojnë. Nuk janë të mjaftueshme.”-tha ai.
Ndë të tjera ai ka thënë se Turqia po përpiqet të gjejë zgjidhje politike brenda kornizës së marrëdhënieve të fqinjësisë së mirë, mbi bazën e ligjit ndërkombëtar në Egje, Mesdheun Lindor dhe Qipro. Sipas mediave greke ai ka vënë në dukje se Turqia është e gatshme për bisedime me Greqinë, përsa i përket kontakteve eksploruese, bisedimeve ushtarake mbi masat e ndërtimit të besimit dhe brenda NATO për të mos përshkallëzuar tensionet.
“Çfarëdo që të ndodhë me popullin e dashur grek, do të ndodhë. Fqinjët tanë Grekë po ndjekin një politikë të gabuar që do t’i shtojë edhe më shumë peshë ekonomisë së saj tashmë të keqe, do të jetë në dëm të prosperitetit dhe do të përkeqësojë jetën e njerëzve të saj. Turqia po përpiqet të gjejë zgjidhje politike brenda kornizës së marrëdhënieve të fqinjësisë së mirë dhe mbi bazën e ligjit ndërkombëtar në Egje, Mesdheun Lindor dhe Qipro. Synimet mbi këtë çështje janë jashtëzakonisht të mira”.- është shprehur ministri turk.
Tensionet mes dy vendeve kanë rinisur në fillim të muajit gusht, kur një anije turke nisi lundrimin në Egje, për të kryer kërkime. Pala greke kërkoi që Turqia të mos kërcënonte, dhe në krah i doli BE dhe Franca. Në kuadër të marrëveshjeve mes autoriteteve Turqia tërhoqi anijen e saj, Oruc Reis, në shtator përpara përpjekjeve diplomatike për të zgjidhur mosmarrëveshjen. Ndërkohë në muajin tetor anija turke ka filluar sërish lundrimet në Egje, por tashmë është kthyer në port. Sakaq, çështja e Turqisë do të diskutohet në samitin e BE ku Athina ka kërkuar të vendosen sanksione ndaj Ankarasë.
