Të shtunën u mbajt Miss Universe Albania & Kosovo dhe fituese të kurorës u shpallën Ina Dajçi për Shqipërinë dhe Tuti Sejdiu për Kosovën. Bukuroshja që do të përfaqësojë Kosovën në Miss Universe, pasi pranoi çmimin të shtunën, u shpreh se ia dedikon suksesin familjes së saj, duke theksuar se në sallë mungonte dikush shumë i veçantë për të. I ati nuk ishte i pranishëm, pasi ndodhet në burg, për faktin që ka luftuar për padrejtësinë që i është bërë.
“Arsyeja që kam ardhur në Miss Universe është familja ime, kishin gjithmonë qejf të shpallesha Miss. Kam aplikuar, kam ardhur dhe nuk e besoja që do e fitoja. Kjo kurorë i dedikohet vetëm familjes sime pasi gjatë jetës së tyre kanë sakrifikuar shumë për mua, e vazhdojnë të sakrifikojnë. Jam e mërzitur, sepse shoh gjithë familjen aty dhe vetëm një karrige është e zbrazët, sepse mungon babai im. Është sot në burg për mua, sepse ka luftuar për padrejtësinë që më kanë bërë,”– u shpreh ajo.
Në një intervistë të dhënë për ATV, Tuti Sejdiu ka rrëfyer historinë tronditëse që fshihet pas fjalëve që ajo tha në skenën e Miss Universe. Tuti tregoi se ishte trafikuar dhe përdhunuar në moshën 13-vjeçare, nga persona që i njeh. Pasi ka trokitur në shumë dyer për të kërkuar drejtësi, babai i saj ka tentuar të bëjë drejtësi vetë për të bijën dhe për këtë arsye ndodhet në burg. Madje, atë nuk e lejojnë ta vizitojë apo komunikojë me të atin dhe ajo tregon se as nuk e di nëse ai është mirë.
“Në moshën 13-vjeçare jam trafikuar nga Kosova në Serbi dhe përdhunuar nga persona të ndryshëm, derisa prindi im nuk ka lënë institucion pa kërkuar drejtësi, për ata njerëz që janë munduar të ma marrin jetën dhe sot janë të lirë, nuk janë në burg. Vetëm se ka kërkuar ndihmë për mua, babai nuk është pranë meje, por në burg. Vetëm që kërkoi ndihmë për drejtësi, sepse drejtësi s’ka pasur asnjëherë. Më e rënda është që unë nuk e di a është mirë, as nuk e lejojnë të na telefonojë, as t’i japim rroba, as ta shohim. Nuk e di a është mirë, e them publikisht se do të luftoj për babin, jo për veten, dhe do e vendos drejtësinë në vend. Të gjithë më kanë bullizuar, më kanë ofenduar dhe kjo kurorë është vlerë e madhe për mua se kam dëshmuar që jam femër e fuqishme, pranë familjes, pavarësisht sfidave që më kanë ndodhur. Njeriun e sfidon njeriu për një arsye dhe sfidon njerëzit e fortë. Për mua asgjë s’është e vështirë, vetëm do kem edhe pak durim që të vendoset drejtësia në vend.”
Intervistën e plotë e gjeni më poshtë.
