Policia e Tiranës nuk do të japë leje për asnjë tubim apo aktivitet politik ose fesiv. Edhe pse jemi në fushatë zgjedhore dhe të gjitha partitë politike kanë nisur riorganizimin e strukturave e tyre, për shkak të rregullave të reja të vendosura nga komiteti teknik kjo do të jetë e ndaluar. Në një intervistë për News24 drejtori i Policisë së Tiranës, Rebani Jaupi kërkoi mirëkuptimin e drejtuesve politikë dhe të qytetarëve në zbatimin e kësaj mase.
Sipas Jaupit qytetarët e kryeqytetit i janë përgjigjur shumë pozitivisht masave parandaluese për mospërhapjen e virusit siç është vendosja e maskës apo ndalimi i daljes pas orës 22:00.
Ka pasur dhe të pabindur, ndaj sipas tij në kryeqytet në 24 orë vendosen rreth 200 gjoba por ato nuk janë qëllim në vetvete për policine. Kryepolici i Tiranës ka sqaruar edhe incidentin me ish-deputetin Kastriot Islami duke e konsideuar të domosdoshme shoqërimin e tij në komisariat për shkak të fjalorit të përdorur.
Ai kërkoi mirëkuptimin e qytetarëve për të bashkëpunuar me policinë pasi edhe vetë uniformat blu janë mjaft të ekspozuar ndaj virusit sars cov-2. Jaupi tha se për fat të keq 3 punonjës të policisë Tiranë kanë humbur jetën nga virusi dhe aktualisht të dyshuar si të prekur janë 68 efektivë .
Situata e pandemisë në vend e ka ngarkuar policinë edhe më një detyrë shtesë për të monitoriar personat pozitivë që trajtohen në banesë për të mos thyer karantinën. Sipas drejtorit të policisë Tiranë pjesa më e madhe e qytetarëve kanë qenë të ndërgjegjshëm dhe nuk e kanë thyer karantinën e detyrueshme.
