Itali- Një 34-vjeçar shqiptar, është gjetur i vdekur në Itali. Ai është identifikuar si Avenir Hysaj, i cili ishte shpallur i zhdukur nga familjarët në 21 shkurt të këtij viti.
Hysaj, punonte murator dhe banonte në zonën e Bra. Sipas mediave të huaja, ai është gjetur i pajetë në një pyll jo shumë larg qytetit dhe vdekja e tij është ende misterioze për ta.
Ndërkohë ekspertët mjekësorë janë duke zhvilluar autopsinë në trupin e pajetë të tij, për të mësuar shkakun e vërtetë të vdekjes. Policia, ka rindërtuar të gjithë ngjarjen.
Të dielën e 21 shkurtit, Hysaj, së bashku me prindërit kishte shkuar në një market për të blerë disa ushqime, por teksa ato i la brenda në dyqan, i riu u largua dhe nuk u kthye më.
Fill pas zhdukjes, familjarët e Hysajt u drejtuan programit televiziv Raitre dhe bënë thirrje qytetarëve që të ndihmonin në dhënien e informacioneve nëse e kishin parë atë.
Shkaqet e vdekjes së tij janë ende mister, pasi sipas policisë nuk dihet nëse është vrarë, ka vrarë veten apo ka vdekur aksidentalisht. Hetimet janë duke u zhvilluar nga Karabinierët, drejtuar nga Prokuroria Publike, të cilët ruajnë me rreptësi konfidencialitetin.
