TIRANË– Ambasadorja amerikane në Tiranë, Yuri Kim ka dhënë një mesazh të fortë lidhur me plotësimin e vendeve vakante në Gjykatën Kushtetuese. Me anë të një mesazhi në Twitter, ambasadorja kërkon që Këshilli i Emërimeve në Drejtësi që të mblidhet brenda javës për t’i dërguar më pas listën e kandidatëve Presidencës dhe Parlamentit.
Ajo shton se proceset duhen respeketuar dhe Gjykata Kushtetuese të jetë funksionale brenda këtij viti, duke kërkuar nga politika që të tregojë vullnet për të plotësuar vendet vakante.
“KED duhet të mblidhet këtë javë për të përfunduar vlerësimin dhe dërguar listën e kandidatëve Presidencës & Parlamentit. Proceset duhen respektuar por jo abuzuar.Nuk ka asnjë arsye praktike që Gjykata Kushtetuese të mos jetë funksionale deri 31 dhjetor. Është çështje vullneti. Udhëheqësit duhet të tregojnë vullnetin e tyre të vërtetë,”-shkruan Kim.
Ndërkohë që edhe ambasadori i Bashkimit Europian në Shqipëri, Luigi Soreca ka shpërndarë postimin e ambasadores Kim duke nënvizuar rëndësinë e plotësimit të Gjykatës Kushtetuese për integrimin.
