Organizata Botërore e Shëndetësisë (OBSH) bëri thirrje të premten për një auditim të laboratorëve kinezë ku u identifikuan rastet e para të Covid-19, si pjesë e hetimit për origjinën e pandemisë.
Kreu i OBSH-së, Dr. Tedros Adhanom Ghebreyesus, propozoi auditimin gjatë një takimi me vendet anëtare të organizatës. Ai tha se për të çuar hetimin përpara ishte e nevojshme të kryheshin “kontrolle të laboratorëve përkatës dhe institucioneve kërkimore aktive në rajonin ku rastet e para u identifikuan në dhjetor të vitit 2019”.
Kërkesa e tij erdhi një ditë pasi tha se ishte e parakohshme të përjashtohej një lidhje e mundshme midis pandemisë dhe një “rrjedhjeje laboratorike”. Ai gjithashtu nxiti Kinën që të ishte më transparente, duke nënvizuar se aksesi në të dhënat e papërpunuara ishte një sfidë për ekipin ndërkombëtar që udhëtoi në Kinë në fillim të këtij viti për të hetuar burimin e Covid-19.
Përveç kontrolleve të laboratorëve kinezë, OBSH gjithashtu dëshiron të kryejë “studime të integruara të njerëzve, jetës së egër, kafshëve, fermave dhe mjedisit” dhe “studime që u japin përparësi zonave gjeografike ku qarkullimi i SARS-CoV-2 është raportuar më herët.”
Përpos kësaj, OBSH bëri thirrje për “studime në lidhje me tregjet e kafshëve në dhe rreth Wuhan-it [ku u raportua për herë të parë virusi], duke përfshirë studime të vazhdueshme të kafshëve të shitura në tregun me shumicë” si dhe “studime në lidhje me aktivitetet e gjurmimit të kafshëve, më shumë punë në epidemiologji dhe epidemiologji molekulare, përfshirë sekuencat e hershme të virusit.”
Të premten, Pekini hodhi poshtë kritikat e kreut të OBSH-së për pretendimin e mungesës së bashkëpunimit të Kinës. Më parë, autoritetet në Kinë e kanë përshkruar teorinë se virusi mund të ketë dalë nga një laborator i Wuhan-it si “absurde”. Madje në Kinë janë promovuar teori që thonë se virusi është importuar nga prodhime deti të ngrira.
Ekipi i ekspertëve të OBSH-së që udhëtoi drejt Kinës, u shpreh në mars se me shumë gjasë, koronavirusi është transmetuar nga lakuriqët e natës te njerëzit përmes një kafshe tjetër.
