Paga reale në sektorin shtetëror u rrit vetëm 0.4% gjatë vitit të kaluar, nga 1.9 për qind në vitin 2019, raportoi INSTAT.
Në dekadën e fundit rritja e pagave në ekonomi, por sidomos në sektorin shtetëror ka qenë e zbehtë. Qeveria u përfshi në një proces të fortë konsolidimi fiskal për të ulur borxhin publik dhe i frenoi disa lloje shpenzimesh të tilla si pagat. Por këtë vit situata ndryshoi disi pasi qeveria aplikoi rritje të pagave në vlerë që shkuan deri në 40 për qind për kategori të tilla si mjekët.
Nga viti 2013 deri në vitin 2020 paga reale në sektorin shtetëror u rrit me 9.8 për qind. Të dhënat e azhurnuara për pagën reale në sektorin shtetëror tregojnë se ritme e larta të rritje u panë përgjatë viteve 2000-2009, ku rritja reale ishte në intervalet 8-17%. Por pas vitit 2013 qeveria ndërmori masa kursimi për shkak se borxhi publik kishte kaluar 70%, teksa të ardhurat buxhetore nuk po rriteshin.
Paga mesatare në sektorin shtetëror arriti 64,389 lekë në fund të vitit 2020 nga 63084 lekë që ishte në vitin 2019.
Si në sektorin privat dhe në atë shtetëror Shqipëria ofron pagat më të ulëta në raport me rajonin. Sipas të dhënave që i takojnë vitit 2019 dhe vitit 2020 të azhurnuara nga Banka Botërore Shqipëri e kishte fondin e pagave në raport me PBB në jo më shumë se 4,5 për qind. në të kundërt vendet e Rajonit të tilla se Maqedonia, Serbia, Mali i Zi, Bosnja dhe Kosova e kanë fondin e pagave për administratën mbi 10 për qind të PBB.
Paga mesatare në Shqipëri, në vitin 2019, ishte 420 euro, që është të paktën 30% më e ulët se gjithë vendet e tjera të rajonit. Pas Shqipërisë, renditet Kosova (602 euro), Maqedonia (617 euro), Serbia dhe Bosnja e kanë pagën mesatare rreth 700 euro. Ndërsa më shumë paguhen punonjësit në Mal të Zi, mesatarisht me 770 euro. Ky nivel pagash është në linjë dhe me të dhënat e Eurostat për të ardhurat për frymë, ku Shqipëria i ka ndër më të ulëtat në Europë, me 31% të mesatares europiane.
Ndonëse ndikim në këtë nivel të ulët mund të ketë dhe informaliteti i lartë në tregun e punës në vend, pagat janë më të ulëta dhe në shtet, përfshirë arsimin dhe mjekësinë, apo dhe në aktivitete ku nuk ka informalitet, si në sektorin financiar apo telekomunikacionet.
Një strategji e Departamentit të Administratës publike në vendin tonë parashikon se, në kuadër të reformimit të sistemit të pagave, është finalizuar një studimi analitik, i cili përcakton rrugën për zbatimin e elementeve të rinj të sistemit të pagave të miratuar nga Ligji i Shërbimit Civil, duke mbajtur në konsideratë parimin “pagë e njëjtë për punë të njëjtë”.
Sipas DAP, kjo reformë e rëndësishme është një element kyç në motivimin e nëpunësve të administratës publike duke ofruar një shpërblim të drejtë për përgjegjësinë dhe punën e gjithsecilit./ B.Hoxha
