Më pak se 20 ditë na ndajnë nga dita kur shqiptarët do të zgjedhin qeverinë e tyre për 4 vitet e ardhshme, por kur “gjakrat janë ndezur” nga të gjithë kampet, Matthew Palmer ka kërkuar një takim me të gjithë kokat e shtetit. Lajmi është konfirmuar nga Ambasada Amerikane në Tiranë, e cila ka bërë me dije se sot do të zhvillohet një takim virtual mes palëve. Pjesë e takimit do të jetë presidenti Ilir Meta, kryeministri Edi Rama dhe kryedemokrati Lulzim Basha. Krerëve të partive politike do të njihen me prishmëritë e Amerikës për zgjedhjet që do të zhvillohen në Shqipëri.
Mesazhi i ambasadës së SHBA:
Zv.Ndihmës Sekretari i Shtetit të SHBA Mattheë Palmer do të zhvillojë sot një “vizitë virtuale” në Shqipëri. Ai do të takohet me Presidentin Meta, Kryeministrin Rama dhe Kryetarin e Partisë Demokratike Basha për të diskutuar mbi përparësitë e Shteteve të Bashkuara, përfshirë pritshmëritë për zgjedhjet e 25 prillit. Zv.Ndihmës Sekretari Palmer do të takohet gjithashtu me kampionët e reformës në drejtësi. Ai do ta përfundojë vizitën e tij me një tryezë të rrumbullakët me gazetarë, të cilët kanë marrë pjesë në programet e shkëmbimit dhe trajnimit të SHBA.
Ndërkohë që prej muajsh ambasadorja amerikanë në Shqipëri, Yuri Kim është kthyer në zërin më të fortë dhe apelues për zgjedhje të drejta e të ndershme, duke përmendur me emra dhe kandidatë që sipas saj nuk duhet të marrin pjesë në proces për shkak të të kaluarës së tyre. Si shembull ajo ka sjellë Tom Doshin.
Ndërsa që herë pas herë bën thirrje edhe për forcat politike që të mbajnë duart larg nga prekja e votave dhe kutive, duke paralajmëruar se me 25 prill do të jetë vetë në terren. Herë pas here, Kim ka bërë të qarta objektivat që SHBA duhen të arrijnë me zgjedhjet në Shqipëri; transparencë! Thirrjeve të saj së fundmi i është bashkuar edhe ambasadori britaik, Duncan Norman.
