Shefi i diplomacisë evropiane, Josep Borrel tha se propozimi për shkëmbim territoresh midis Kosovës dhe Serbisë ishte real dhe ka qarkulluar në tryeza diplomatike.
Në një intervistë për mediat serbe, ai thotë se ky opsion i përket të kaluarës.
“Zgjidhja gjendet vetëm mes palëve. Ne nuk diktojmë asgjë. Në parim, ne duam të jemi vetëm ndërmjetës. Ka shumë vende të BE-së që kundërshtojnë fuqishëm idenë e shkëmbimit të territoreve. Pak muaj më parë ka pasur një propozim të tillë, por ky nuk është më një opsion”, thekson Borrel.
Ai tha se pret që administrata e Joe Biden të ketë partneritet të fortë me BE-në në të gjitha çështjet. Arsyeja, siç tha ai, është se BE-ja dhe SHBA-ja nuk garojnë në Ballkan, veçanërisht kur bëhet fjalë për dialogun midis Prishtinës dhe Beogradit.
“Unë drejtova një nga takimet mbi dialogun midis Prishtinës dhe Beogradit. Emocionet janë të forta dhe mendoj se është e kuptueshme, sepse dialogu është kërkues dhe i vështirë, i ngarkuar nga historia”, është shprehur ndër të tjera.
