PRISHTINË-Kosova dhe Serbia ende nuk kanë arritur një marrëveshje të mirëfilltë. Ndërkohë, që një propozim për të arritur një zgjidhje ka qenë dhe mundësia e shkëmbimit të territoreve. Sakaq për këtë ka reaguar Përfaqësuesi i Lartë i Bashkimit Evropian për Punët e Jashtme, Josep Borrell, i cili ka thënë se para disa muajsh ka pasur një propozim për shkëmbim territoresh ndërmjet Kosovës dhe Serbisë, por aktualisht kjo nuk është më një mundësi.
“Disa muaj më parë kishte një propozim për të shkëmbyer territore. Por kjo nuk është më një mundësi”, tha Borrell, duke shtuar se ka vende të BE-së që kundërshtojnë shkëmbimin e territoreve.
Gjithashtu dhe i dërguari i posaçëm i Bashkimit Evropian për bisedimet mes Kosovës dhe Serbisë, Miroslav Lajçak, ka deklaruar para tre ditësh se ideja për shkëmbimin e territoreve është e shekullit të 19-të, ajo që duhet tani është një zgjidhje që bazohet në këtë shekull. Sakaq, mediat dhe politikanë të ndryshëm kanë akuzuar kryeministrin Edi Rama se qëndron pas kësaj ideje.
