Agjencia Kombëtare e Shoqërisë së Informacionit synon që të ngrejë një qendër operimi dhe monitorimi për e-GOV, që është një qendër të dhënash dhe rrjet qeveritar mbi të cilin mbështeten një seri shërbimesh dixhitale ofruar për administratën publike dhe qytetarët.
Një procedurë e shpallur së fundmi nga kjo agjenci me një fond limit prej 267 milionë lekësh apo pak më shumë se 2 milionë euro jepen edhe detajet mbi atë se çfarë parashikohet të bëhet. Në thelb sipas AKSHI-t edhe pse sistemet në mënyrën e tyre operative janë të sigurta ajo që pritet të bëhet është rritja e mëtejshme e hallkave të sigurisë.
“Të gjitha komponentët kyçe të rrjetit GovNet janë të strukturuara dhe menaxhuara në mënyrë të sigurt, sipas politikave të ndryshme të sigurisë. Ndërkohë aktualisht për rrjetet e brendshme të institucioneve të lidhura në GovNet stafi teknik i AKSHI nuk ka një vizibilitet të qartë të pajisjeve të cilat mund të lidhen në rrjet. Bazuar në faktin që ‘target-i’ më i preferuar nga keqdashësit në internet janë përdoruesit e thjeshtë fundor për të arritur më pas të ndërhyjnë në sisteme të ndryshme, arritja e një vizibiliteti në rrjet se çfarë pajisje janë lidhur dhe çfarë mund të bëjnë ato pajisje momentin që lidhen duke i aplikuar politika të ndryshme të qendërzuara do të shtonte akoma më shumë sigurinë jo vetëm të përdoruesve fundor por edhe të platformave digjitale që ato përdorin gjatë punës së përditshme”, thuhet në dokument.
I njëjti specifikon edhe qëllimet që ka kjo kontratë ku së pari përmirësimi i pajisjeve dhe topologjisë se rrjetit për AKSHI edhe për Ministritë, duke zëvendësuar, instaluar dhe konfiguruar pajisjet e rrjetit të amortizuara te AKSHI edhe te ministritë.
Së dyti implementimi i platformës për kontrollin e aksesit të pajisjeve të rrjetit. Instalimi dhe konfigurimi i apliance të cilët do te shërbejnë për kontrollin e aksesit të pajisjeve të rrjetit. Zgjidhja duhet të jetë afatgjatë dhe ofrojë disponueshmëri të lartë.
Së treti krijimi i qendrës së operacioneve, në të cilin do të përfshihet sistemi video-wall që do të shërbejë për monitorimin e sistemeve në kohë reale nga ana e specialisteve edhe operatoreve në AKSHI. Përshtatja e ambientit për krijimin e qendrës se operacioneve. Instalimi i dyshemesë teknologjike dhe kryerja e të gjithë instalimeve elektrike edhe të rrjetit.
Së katërti implementimi i sistemit video-wall me përmasa 2×4 qe do të shërbejë për monitorimin e sistemeve në kohë reale nga ana e specialisteve edhe operatoreve në AKSHI.
Së pesti implementimin e një sistemi, i cili do të shërbejë për menaxhimin e infrastrukturës në Data Center qeveritar. Në ketë sistem do të integrohen pajisje ekzistuese të infrastrukturës si PDU, pajisje server/storage, pajisje rrjeti si dhe trajnimin i përdoruesve dhe stafit IT për të gjithë pjesët e këtij projekti.
Marrë nga Monitor.al
