VLORË- Kryeministri Edi Rama ka mbledhur ditën e sotme në vilën qeveritare në Vlorë, kandidatët për deputetë për zgjedhjet e 25 prillit.
Në një aktivitet politik nga vila qeveritare, Rama është ndalur gjatë në listat e kundërshtarëve politike, duke theksuar se i ka rënë në sy fakti që Partia Demokratike ka kaluar numrin e lejuar të emrave, megjithatë nuk ka përfshirë asnjë përfaqësues minoriteti.
I shqetësuar se asnjë prej kandidatëve demokratë nuk jeton në Vlorë për të përfaqësuar siç duhet demokratët, kryesocialisti ka marrë një më një emrat kandidatëve të tij, duke shtuar se të gjithë do ta gjejnë përfaqësimin tek ta, pasi këta kandidatë janë nga Vlora, dhe ja dinë të gjitha nevojat dhe problemet banorëve të zonës, duke shtuar se të gjithë do ta gjejnë përfaqësimin tek ta.
“Qoftë seksesi i Çamërisë dhe Greqisë kanë vajtur bashkë në listën e Tiranës. E kam thënë edhe më parë, si mundet t’i ofrohet Vlorës Leksua si komandant. Është i njësuar plotësisht me alkoolin, degradimin, shpërfytyrimin e përsonit publik. Një njeri që si kryetar i KLSH zhvillonte mundje të lira në lokale lart e poshtë. Nuk ka lidhje me të ardhmen e Vlorës. Është një nga fosilet e PD. Si mund t’i thuhet Vlorës për njerëz që nuk banojnë këtu. Kush do qëndrojë këtu dhe do të dëgjojë hallet e njerëzve?Kush? Cili? Asnjë banor Vlore,”-tha Rama.
Duke përmendur edhe njëherë punën e viteve, Rama ka kërkuar edhe nga Vlora votëbesimin për një tjetër mandat, sipas tij si kohë shtesë për të mbyllur premtimet e bëra. Rama nuk ka harruar që të falenderojë edhe deputetët aktualë të PS-së në Vlorë, të cilët nuk do të rikandidojnë për postin, por nuk tha asnjë koment për kryebashkiakun Dritan Leli. Mesa duket kreu i maxhorancës ka vendosur ta nisë nga qarku ku vetë renditet i teti prezantimin e ekipit, ndërsa nuk dihet se me cilin qark do të vijojë.
