Rritja e aktiveve në valutë të huaj të sektorit bankar po sjell edhe një zgjerim të vendosjes së tyre jashtë vendit.
Të dhënat e Bankës së Shqipërisë tregojnë se aktivet jorezidente në mesin e këtij viti arritën vlerën e 366 miliardë lekëve.
Që nga fillimi i vitit, aktivet jorezidente janë rritur me 10%, ndërsa krahasuar me një vit më parë vlera e tyre është 9% më e madhe. Vlera e aktiveve jo rezidente ka arritur nivelin më të lartë që prej fundit të vitit 2018, nëse përjashtojmë tremujorin e parë të vitit të kaluar, kur rritja erdhi kryesisht si pasojë e një luhatjeje të përkohshme të kursit të këmbimit.
Rritja e aseteve të investuara jashtë vendit është kryesisht rezultat i zgjerimit të shpejtë të depozitave në valutë të huaj, sidomos në euro. Depozitat në valutë në fund të muajit qershor arritën në shumën e barasvlershme të pothuajse 684 miliardë lekëve, me një rritje vjetore prej 9%. Ato përbëjnë 51.1% e totalit të depozitave bankare dhe mes tyre euro vazhdon të ngelet monedha e preferuar e shqiptarëve për të mbajtur kursimet.
Hapësirat për të investuar valutën në asete brenda vendit duken më të kufizuara, po të kemi parasysh se në vitet e fundit huamarrja është më e orientuar drejt lekut. Sipas Bankës së Shqipërisë, kredia në valutë tashmë zë më pak se gjysmën e portofolit të kredisë së sektorit bankar. Për të shmangur rritjen e ekspozimeve ndaj lëvizjeve të kursit të këmbimit, huadhënia në valutë po reduktohet ndjeshëm, sidomos tek individët.
Duke hequr kredinë në valutë brenda vendit dhe pjesën që mbahet në formën e rezervës së detyrueshme pranë llogarive të Bankës së Shqipërisë, për shumicën e fondeve të tjera në valutë duhet gjetur një zgjidhje për investimin ose mbajtjen e tyre jashtë vendit.
Një pakicë e këtyre aktiveve janë kredi e dhënë subjekteve jo rezidente në Shqipëri, me rreth 17% të totalit. Megjithatë, edhe kredia për jorezidentët këtë vit paraqitet në rritje me ritme të konsiderueshme, me afërsisht 15% me bazë vjetore.
Por, pjesa më e madhe e këtyre aktiveve konsiston në investime në letra me vlerë të subjekteve jashtë vendit ose në vendosje në institucione të huaja financiare.
Investimet në letra me vlerë të emetuesve jashtë Shqipërisë në mesin e këtij viti arritën vlerën e rreth 155 miliardë lekëve, në rritje vjetore me 3.5%. Ato janë edhe instrumenti kryesor në portofolin e aseteve jorezidente, me 42% të totalit. Pjesa e mbetur, prej afërsisht 41% e aktiveve jorezidente, konsiston në vendosje dhe depozita në institucione financiare jashtë Shqipërisë.
Marrë nga Monitor.al
