FIER– Sekuestrohen 1.5 milion euro pasuri! Përmes një njoftimit zyrtar, Policia e Fierit bëri me dije se janë sekuestruar prona dhe makina me vlerën e 1.5 mln eurove, në pronësi të 49-vjeçares me inicialet R. H.,(Z). banuese në Fier. Bëhet fjalë për një bar restorant në Skelë, Vlorë; një apartament në Vlorë; një apartament në Pogradec dhe një automjet tip “Benz”.
Kjo pasuri dyshohet se rrjedh nga veprimtaria kriminale e Shaban Zenajt, ish-bashkëshortit të 49-vjeçares, e cila rezulton pronare e të mirave materiale. Zenaj, i ekstraduar në Itali, është dënuar nga autoritetet italiane me 14 vjet burg.
Ai është hetuar për pastrim të veprimtarisë kriminale dhe për rrjedhojë janë sekuestruar pasuritë që ka lënë në emër të bashkëshortes. Gjithsesi, në njoftimin e policisë thuhet se hetimi vijon, për të sekuestruar edhe prona të tjera të blear nga veorimtaria e Zenajt por që mund t’i ketë lënë në emër të një tjetër personi.
Njoftimi i policisë Fier
Në kuadër të luftës kundër pastrimit të parave, gjurmimit dhe identifikimit të aseteve që janë përfituar nga veprimtari kriminale u finalizua operacioni policor i koduar “Kuadrati”. Vendoset sekuestro preventive mbi disa pasuri me vlerë rreth 1.500.000 euro, të cilat dyshohet se rrjedhin nga veprimtaria kriminale e subjektit. Nga Seksioni për Hetimin e Krimit Ekonomik e Financiar në Drejtorinë Vendore të Policisë Fier, në bashkëpunim me Prokurorinë e Rrethit Gjyqësor Fier, pas një hetimi disamujor, u bë i mundur finalizimi me sukses i operacionit të koduar “Kuadrati”, si rezultat i të cilit u bë ekzekutimi i vendimit të Gjykatës së Shkallës së Parë Fier, datë 26.11.2020, për vendosjen e sekuestros preventive ndaj pasurive të shtetases R. H.,(Z)., 49 vjeçe, banuese në Fier. Në zbatim të vendimit të Gjykatës u bë i mundur sekuestrimi i pasurive të luajtshme e të paluajtshme, ku vlera totale e pasurive të sekuestruara në Vlorë dhe Pogradec shkon rreth 1.500.000 euro, konkretisht: • Një bar restorant në Skelë, Vlorë; • Një apartament në Vlorë; • Një apartament në Pogradec; • Një automjet tip “Benz”. Shumat e konfiskuara dyshohet se janë produkt i veprës penale “Trafikimi i narkotikëve”, për të cilën ish-bashkëshorti i saj, shtetasi Shaban Zenaj, i ekstraduar në Itali, është dënuar nga autoritetet italiane me 14 vjet burg. Këto sekuestrime pasurore janë në kuadër të procedimit penal, ndaj shtetasit Shaban Zenaj, si person i dyshuar për kryerjen e veprës penale “Pastrimi i produkteve të veprës penale ose veprimtarisë kriminale”. Vijojnë hetimet dhe verifikimet për evidentimin e pasurive të tjera që mund të jenë në emër të këtij shtetasi dhe personave të lidhur me të.
