Presidentja në detyrë e Republikës së Kosovës Vjosa Osmani e cila ndodhet në Shqipëri në një vizitë zyrtare 3-ditore ka folur përpara kuvendit shqiptar. Osmani bëri thirrje që Shqipëria dhe Kosova të jenë bashkë në luftën për drejtësi. Ajo përmendi edhe një pjesë nga jeta e saj, ku gjyshin ia vranë serbët, kurse dajën regjmi i Enver Hoxhës.
“Serbia nuk ka ndryshuar duhet të bashkohemi që të mos lejojmë që e vërteta të përmbyset para syve tanë. E vërteta është që Serbia kreu gjenocid në Kosovë dhe Kosova mbrojti pragun e saj. Të punojmë bashkë me dy flamuj por me një shpirt që nuk ka mundur askush që ta mposhtë e t’i tregojmë botës se ne do t’ia dalim. Kosova nuk ka nevojë për tra të vendosur nga Shqipëria. Ju ftojmë që të punojmë që edhe flamuri i republikës së Kosovës të valojë në Nato e në Kombet e Bashkuara. Gjyshi im ka përjetuar tortura nga serbët e nga ato tortura vdiq, nga ana tjetër vëllai i nënës iku nga torturat e serbëve por u varros për së gjalli nga regjimi i Enver Hoxhës. Kjo nuk është vetëm historia ime por është histori e mijëra familjeve shqiptare por le të jetë guximi i tyre për tu thënë jo regjimeve shtypëse për secilin prej nesh ku rinia jonë ndikohet nga vendimet që marrim ne”, tha në fjalën e saj Osmani.
