Sot në Kosovë shënohet Dita e të Mbijetuarave të Dhunës Seksuale gjatë luftës së fundit në vend. Kjo datë përkon me ditën e rrëmbimit të Vasfije Krasniqit nga forcat serbe.
Më 14 prill të vitit 1999, Vasfije Krasniqi u rrëmbye me forcë dhe u dhunua në mënyrë barbare nga forcat serbe. Ajo është gruaja e parë shqiptare në Kosovë e dhunuar seksualisht që ka dalë hapur për të folur mbi dhunën seksuale të ushtruar mbi të. Deri tani në Kosovë llogariten rreth 20 mijë të mbijetuar të dhunës seksuale nga forcat serbe.
Për të shënuar këtë ditë do të zhvillohet një ekspozitë për të ilustruar shpresat dhe nevojat e të mbijetuarave të dhunës seksuale të luftës në Kosovë, ku më pas presidentja e Kosovës Vjosa Osmani do të dalë në deklaratë për mediat. Kjo ditë u propozua nga Vjosa Osmani, dhe shënohet nën patronazhin e saj.
