Këtë vit shqiptarët po sigurohen më shumë ndaj katastrofave natyrore.
Të dhënat e Autoritetit të Mbikëqyrjes Financiare (AMF) tregojnë se për periudhën janar-maj të këtij viti primet e sigurimit nga zjarri dhe fatkeqësitë natyrore u rritën me 41% krahasuar me të njëjtën periudhë të një viti më parë.
Për pesë muaj, shqiptarët shpenzuan 936 milionë lekë ose rreth 7.6 milionë euro për të siguruar pronat. Në vlerë primesh, rritja është megjithatë shumë më e lartë po të krahasohet me numrin e kontratave, që për klasat e sigurimit të pronës u rritën me 11.5% në pesë muajt e parë të këtij viti. Fakti që primet po rriten me ritme më të larta se numri i kontratave në thelb tregon se sigurimet e pronës këtë vit po bëhem për vlera ose limite më të mëdha mbulimi. Kjo shpjegon edhe primet më të larta për kontratë.
Sipas ekspertëve të tregut, kjo mund të lidhet me faktorë të ndryshëm, përfshi këtu ndoshta më shumë sigurime nga bizneset. Por, ndoshta një faktor që po ndikon rritjen e primeve nga sigurimet e pronës mund të jetë edhe rritja e çmimeve në tregun e pasurive të paluajtshme. Në pjesën më të madhe, sigurimet e pronës nga individët janë të lidhura me kreditë bankare. Banka kërkon sigurimin e detyrueshëm të pronës së lënë si kolateral përgjatë gjithë kohëzgjatjes së kredisë.
Në prononcimet e tyre për Monitor, bankierët kanë vënë në dukje se rritja e çmimeve të pronave ka sjellë edhe rritjen e vlerave mesatare të kredisë që klientët kërkojnë në banka për të blerë këto prona. Kreditë në vlera më të mëdha përkthehen edhe në limite më të mëdha mbulimi për sigurimin e pronës, që nga ana tjetër nënkupton prime më të larta sigurimi që paguhen nga huamarrësit. Të dhënat nga Banka e Shqipërisë tregojnë se për periudhën janar-prill, sektori bankar disbursoi rreth 10.5 miliardë lekë ose mbi 85 milionë euro kredi të reja për shtëpi. Ky është niveli më i lartë në të paktën gjashtë vitet e fundit.
Tërmeti i vitit 2019 gjithashtu ka sjellë një lloj ndërgjegjësimi për sigurimin e pronës, qoftë edhe në segmentin e atyre që e kanë blerë shtëpinë me kredi. Nëse më parë shumë huamarrës e siguronin pronën e lënë si kolateral deri në vlerën që iu kërkohej nga banka, pas tërmetit shumë prej tyre po i sigurojnë pronat mbi vlerën e plotë, për të qenë të mbrojtur ndaj ngjarjeve të tilla në të ardhmen. Tërmetet duket se kanë sjellë disa efekte pozitive në tregun e sigurimit të pronave, por përmasat e tij ende ngelen shumë të vogla. Për vitin e kaluar, shqiptarët shpenzuan mesatarisht më pak se 4 euro për frymë për të siguruar pronat nga fatkeqësitë natyrore. / E.Shehu
Marrë nga Monitor.al
