Hetuesit belgë kontrolluan zyrat në Parlamentin Evropian në Bruksel të hënën, pas hetimeve për ryshfet nga Katari, mikpritës i Kupës së Botës, pasi pranuan dhurata dhe vlera të shumta monetare. Ishte kontrolli i 20-të i kryer në Belgjikë që nga e premtja dhe presidentja e parlamentit, Roberta Metsola, paralajmëroi eurodeputetët se “demokracia është nën sulm”.
Policia belge ka arrestuar katër persona, mes tyre edhe zëvendëspresidenten e Parlamentit Evropian Eva Kaili, një eurodeputete greke. Katari ka mohuar akuzat për ryshfet. Eurodeputetët do të debatojnë për skandalin ditën e sotme.
Prokurorët belgë thanë se para me vlerë rreth 600,000 euro (632,000 dollarë; 515,000 £) u gjetën në shtëpinë e një të dyshuari, 150,000 euro në banesën e eurodeputeti dhe disa qindra mijëra euro në një valixhe në një dhomë hoteli në Bruksel. Janë marrë edhe kompjuterë dhe celularë.
Që nga e premtja, burimet e IT-së të 10 punonjësve të parlamentit janë “ngrirë” për të parandaluar zhdukjen e të dhënave të nevojshme për hetimin. Katër të dyshuarit e arrestuar nga policia belge janë akuzuar për “pjesëmarrje në një organizatë kriminale, pastrim parash dhe korrupsion”, thanë prokurorët në një deklaratë të dielën.
Kaili, eurodeputetja greke për tetë vjet, u pezullua nga detyra e saj si një nga 14 nënkryetaret nga presidenti i parlamentit Metsola. Ajo është pezulluar gjithashtu nga Grupi i Socialistëve dhe Demokratëve në parlament dhe është përjashtuar nga partia e qendrës së majtë greke Pasok.
Prokurorët në Greqi thuhet se kanë ngrirë të gjitha pasuritë e zonjës Kaili. Gjashtë persona u arrestuan të premten si pjesë e hetimit mbi akuzat se Katari korruptoi zyrtarët e BE-së për të fituar ndikim. Dy u liruan më vonë.
Asnjë i dyshuar nuk është përmendur publikisht, por zonja Kaili mësohet të jetë në mesin e atyre që janë paditur. Tre të akuzuarit e tjerë janë të gjithë shtetas italianë dhe mes të akuzuarve është edhe partneri i saj Francesco Giorgi, i cili është asistent parlamentar.
“Demokracia evropiane nën sulm”
Presidentja e Komisionit Evropian Ursula von der Leyen tha se akuzat ishin “shumë serioze” dhe bëri thirrje për krijimin e një organi të ri të etikës për të mbikëqyrur bllokun. Roberta Metsola, presidentja e Parlamentit Europian u zotua para eurodeputetëve se integriteti i parlamentit do të rivendoset.
“Demokracia evropiane është nën sulm dhe shoqëritë tona të lira dhe demokratike janë nën sulm,” tha ajo. Mbikëqyrësit dhe eurodeputetët thanë se hetimi i ryshfetit mund të përfaqësojë një nga skandalet më të mëdha të korrupsionit në historinë e parlamentit.
