‘Sunny Hill Festival’, këtë vit do të transferohet nga Prishtina në Tiranë. Themeluesi dhe organizuesi i këtij aktiviteti, Dukagjin Lipa, përmes një njoftimi publik, ka lajmëruar se arsyeja e mosmbajtjes së festivalit në Prishtinë është “për shkak të vonesave të shumta, të shkaktuara nga mungesa e përgjigjes dhe vendimit përfundimtar për dhënien në shfrytëzim të hapësirës për festivalin”.
Në letrën që Dukagjin Lipa u ka dërguar krerëve të shtetit dhe zyrtarëve të tjerë institucionalë, të cilën e ka publikuar në Facebook, thuhet se edhe pse janë në vitin e tretë të pritjes për përgjigje përfundimtare për dhënien e një hapësire në shfrytëzim të platformës së festivalit, kjo kohë, sipas tij, ka qenë e pamjaftueshme për institucionet të marrin një vendim përfundimtar, i cili do t’ia lejonte festivalit përgatitjet për mbajtjen e këtij edicioni.
Këngëtarja Dua Lipa, ka reaguar pas anulimit të festivalit të organizuar nga ajo dhe babai i saj “Sunny Hill Festival”, në Prishtinë, dhe zhvendosjes në Tiranë. Tirana zyrtare, nga ana tjetër, e ka përshëndetur këtë lajm të mirë për të gjithë dashamirësit e artistes shqiptare dhe muzikës së saj.
