Projekti i termocentralit të Vlorës me një kapacitet 98MW dhe që u ka kushtuar shqiptarëve rreth 100 milionë euro ishte për të nëntin vit në 2020-ën në konservim.
Enti Rregullator i Energjisë (ERE) nënvizoi në raportin e tij vjetor se problematika ende lidhet me defektin në sistemin e ftohjes ndërkohë që përpjekja për ta dhënë me koncesion përfundoi në anulim.
“Përgjatë vitit 2020, shoqëria TEC Vlora sh.a., ka ushtruar veprimtarinë e saj në lidhje me konservimin e asetit gjenerues i cili nuk është në gjendje pune për shkak të defektit të shfaqur në sistemin e ftohjes që nga viti 2012. Ndërkohë, nga Ministria e Infrastrukturës dhe Energjisë, më datë 28.12.2019, u bë shpallje publike për oferta për koncesionin me objekt “Për rehabilitimin dhe vënien në punë të Termocentralit të Vlorës si dhe të ndërtimit të tubacionit Fier-Vlorë të furnizimit me gaz të TEC-it, të formës R.O.O.T.”. Proceduara kishte si autoritet kontraktor Ministrinë e Infrastrukturës dhe Energjisë, e cila organizoi edhe garën për kalimin në koncesion të këtij aseti gjenerues, e cila sikurse edhe publikuar është anuluar si procedurë. Meqë TEC Vlora sh.a. ndodhet në kushte konservimi, konsumi vetjak i TEC Vlorës garantohet nëpërmjet linjës së furnizimit 220 kV, N/Stacioni Babicë dhe mbulohet nga KESH sh.a” thuhet në raportin e ERE.
I njëjti nënvizon se për momentin, nga Shqipëria nuk del gaz, mbetet pezull rrjeti i transmetimit të gazit në Shqipëri dhe rezervimi i kapacitetit në Fier ose në Kuçovë i planifikuar për pikat e daljes. “Është tepër emergjente ngritja e infrastrukturës së gazit sepse jo vetëm është më ekonomikë përdorimi i tij, por ka edhe emetime shumë herë më të vogla, duke ulur në masë të konsiderueshme ndotjen e ambientit. Konsumatori i parë duhet të jetë TEC-i i ndërtuar në Vlorë, i cili ende nuk është vënë në funksion. Theksojmë se me vendosjen në punë të TEC-it me gaz kostoja e importit të energjisë elektrike përgjysmohet si dhe do të ndikojë në uljen e humbjeve teknike për jugun e Shqipërisë” thuhet në raport.
Për TEC Vlorën tashmë ka të tjera zhvillime të pritshme. Vetëm pak javë më parë mes qeverisë dhe kompanisë amerikane Exxon Mobile u nënshkrua një marrëveshje që parashikon riparimin dhe vënien në punë të termocentralit. Po kështu përveç TEC -it parashikohet që qyteti i Vlorës të kthehet në një qendër shpërndarje për gazin LNG që do të vijë nga Shtetet e Bashkuara të Amerikës.
Marrë nga monitor.al
