Greqi- Një shqiptar u arrestua nga oficerët e policisë greke të Athinës paraditen e kësaj të hëne, nën akuzën e transportit dhe trafikut të drogës.
Shqiptari, identiteti i të cilit nuk bëhet i ditur, u kap duke transportuar 14 kg kokainë dhe rreth 287 mijë euro të fshehura në brendësi të ndenjëses së shoferit.
Ai vinte nga Italia me një kamion transporti ndërkombëtar, përmes tragetit Ancona Italy-Patra. Sipas informacionit, destinacionet e tij ishin Belgjika dhe Hollanda, ndërsa dyshohet se ai furnizohej me sasitë e kokainës, nga vendet e Amerikës Latine dhe se është pjesë e një grupi që merret me trafik ndërkombëtar.
Autoritetet greke thonë se hetimi vijon për të identifikuar anëtarët e tjerë të organizatës kriminale. Sa i përket shoferit, Policia Greke thotë se ai nuk është vetëm një transportues i thjeshtë dhe gjatë marrjes në pyetje ka mbajtur qëndrim të ashpër dhe ka refuzuar të përgjigjet.
