Detaje të reja kanë dalë në dritë tre muaj e gjysmë nga zhdukja e 19-vjeçares me origjinë shqiptare Artemis Vasilis, në Koropi të Greqisë.
Një dëshmi e mbërritur në emisionin grek “Dritë në tunel”, tregon se ditën që ajo u zhduk, u pa duke pritur në një stacion autobusi të Atikës në Koropi. Nga andej kalojnë autobusët që përfundojnë në Glyfada dhe Vari. Gjithashtu dëshmitari pretendoi se policia e dinë se ku ndodhet Artemis.
“Policia e Omonias e di shumë mirë se ku është Artemis. Ka disa oficerë policie që paralajmërojnë se kur është koha për t’u larguar. Ditën që shkoi prokurori, ata u larguan nga dera e pasme. Ata u zhdukën dhe e morën Artemis nga atje. Ajo ishte në Iasonos në Metaxourgeio”, tha dëshmitari.
Ndërkohë një dëshmi ka dhënë dhe shoqja e Artemis. Ajo thotë se një incident i ndodhur në korrik të 2020 mund të ketë lidhje me zhdukjen e saj.
“Një ditë në verë, prindërit e saj po e kërkonin sepse ajo mungonte me orë të tëra. Ajo më kishte thënë se do të shkonte për të notuar. Unë nuk e besova, megjithatë. Ka shumë skenarë që kalojnë nëpër mendjen time. Kam frikë se i ka ndodhur diçka e keqe”, tha ajo.
