Itali- Nipi i Moisi Habilajt, të arratisur që nga dita e djeshme që është shpallur në kërkim ndërkombëtar nga autoritetet italiane ka treguar se nuk e ka idenë se ku mund të ketë përfunduar xhaxhai i tij.
Gazetari Dario De Luca tha për Syri.net se ka komunikuar një natë më parë me nipin e Habilajt, i cili i ka thënë se që pas fikjes së telefonit, nuk ka komunomuar më me xhaxhain.
“Mbrëmje e djeshme kemi folur nëpërmjet Facebook me nipin e Habilajt. Ai na ka konfirmuar se nuk ishte në Raguza, por në San Michele di Ganzaria. Siç është shkruar edhe në artikull, ai (Habilaj) ka qenë në shtëpinë e vëllait për gati dy muaj dhe më pas ka shkuar për të jetuar në një apartament. Familjarët thonë se nuk e dinë se ku ka përfunduar,”– është shprehur De Luca.
Lajmi për arratisjen e Habilajt u bë publik një ditë më parë nga autoritetet italiane, të cilat e kanë shpallur në kërkim ndërkombëtar. Gjykata e Apelit e Katanias e dënoi pak kohë më parë, përfundimisht me 15 vite e 5 muaj burg Moisi Habilajn. Para se të ekzekutohej vendimi i Apelit, Moisi Habilaj ishte caktuar në “arrest shtëpie”, pasi kaloi 954 ditë pas hekurave.
Sot, mediat italiane shkruanin se në fakt arratisja e Habilajt nuk ka të bëjë me dënimin e tij për trafik të lëndëve narkotike por për të shmangur dëshminë e tij në gjyqin ndaj ish-ministrit Saimir Tahiri.
