Është ulur avioni i parë në Rinas, dy ditë pas bllokimit të aeroportit. Avioni ka ardhur nga Turqia, Stambolli dhe është ulur në Rinas me ngarkesën e radhës të vaksinave kineze anti-Covid.
Në Rinas, avioni do të pritet nga kontrollorët turq, të cilët kanë ardhur në Shqipëri përmes rrugës tokësore, nga Podgorica.
Ndërkohë nga nesër, pasagjerët do të mund të nisin fluturimet komerciale. Kur kanë kaluar më shumë se 24 orë nga protesta e kontrollorëve në Rinas, sot nisën fluturimet esenciale, Policia dhe Prokuroria kanë nisur hetimet, duke prangosur tre prej kontrollorëve, ndërsa presidenti Meta ka kërkuar auditimin e plotë të “Albcontrol”. Për situatën, nuk kanë munguar as sulmet politike.
Çfarë ndodhi ditën e djeshme?
Aeroporti i Rinasit ka pezulluar ditën e djeshme të gjitha fluturimet. Shkak është bërë mosplotësimi i kërkesave të kontrollorëve. Ministrja Belinda Balluku ka hequr të gjitha përgjegjësitë nga shteti, ndërsa ka ngritur alarmin për “puç shteti”. Presidenti Ilir Meta ka kërkuar zgjidhje nga qeveria, ndërsa kryeministri Edi Rama i ka kërcënuar punonjësit e ‘Albcontrol’ me burg. Në letrën e publikuar nga Dosja.al të nënshkruar nga punonjësit thuhej se ata kanë nevojë për një periudhë tre ose katër ditore rikuperimi pasi ndihen të lodhur dhe të stresuar nga mungesa financiare për shkak të pandemisë.
