Elbasan- Presidenti Ilir Meta ka komentuar sot vënien në funksion të Gjykatës Kushtetuese, pas plotësimit me gjashtë anëtarë.
Megjithatë kreu i shtetit theksoi se duhet ende punë që gjykata të jetë plotësisht funksionale.
“Mendoj se Gjykata Kushtetuese ka qenë dhe duhet të jetë investimi më i rëndësishëm. Presidenti ka bërë çdo përpjekje që Shqipëria të mos mbetej pa Gjykatë Kushtetuese. Por ka ende punë për ta bërë plotësisht funksionale, për presidentin kjo është një çështje thelbësore dhe uroj që e gjithë pavarësisht anëtarëve të kësaj gjykate që deri tani janë bërë pjesë e saj të kenë përgjegjshmëri maksimale, për të mbrojtur demokracinë, interesin kombëtar dhe unë do të mbështes pavarësinë e këtij institucioni”, u shpreh Meta.
Më tej, kreu i shtetit përmendi edhe përplasjen e disa kohëve më parë , me kreun e KED asokohe, Ardian Dvoranin si dhe Parlamentin. Meta theksoi se Komisioni i Venecias foli qartë lidhur me këtë debat, ndërsa shtoi se ajo situatë nuk mund të krahasohet me këtë të sotmen.
“Nuk ekziston asnjë tërheqje nga ana e presidentit për sa i takon kushtetueshmërisë së procesit. Ky proces ka mangësitë e tij nga ana e ligji dhe aspekte të tjera, çdo spekulim për të krahasuar situatën aktuale mes të kur ndodhi përplasja me presidentin dhe ish kreun e KED është e pavend sepse në atë rast ishte një përpjekje për të rrëmbyer një anëtar të Gjykatës Kushtetuese që i takon presidentit dhe ta marrë mazhoranca. Komisioni i Venecia ka folur qartë se kush e shkaktoi këtë incident që u bë i qëllimshëm. Duhet të falënderoj Budestagun që prej kohësh vendosi si kusht bërjen funksionale të gjykatës Kushtetuese”, tha presidenti.
